नरकासूराचें कवित्व

भांगरभूंय | प्रतिनिधी

असले वेसनी भुरगेच नरकासूर नाचयतात. दोश कोणाक दिवपाचो नरकासूराक काय आपल्या सुवार्था खातीर तरणाट्यांक वेसनाक लावपी राजकारण्यांक?

शिगमो गेलो पूण कवित्व उरलें अशें म्हणटात. शिगम्या दिसांनी सगल्यांक सगलें माफ आसता असो समज. आनी हाकाच लागून शिगम्या दिसांनी हाचें ताचें उणें काड, कोणाचीं फकांडां मार तींय बी सामक्या सकयल्या थरार वचून अशें चलता. कोणाकूय राग हो येतलोच पूण शिगम्या दिसांनी कोण राग दाखयनात. पूण हो राग मनांत उरताच आनी उपरांत ताचो स्फोटूय जाता. म्हणजेच शिगम्या उपरांतूय कवित्व उरता. सद्याक दिवाळी चल्ल्या. आमच्यो दोन दिवाळ्यो. धाकटी दिवाळी आनी व्हडली दिवाळी. व्हडली दिवाळी म्हणल्यार तुळशीचें लग्न. हें तुळशीचें लग्न जालें म्हणजे दिवाळीचो सण सोंपता. तर ह्या तुळशी लग्नाचो आयज निमाणो दीस. फाल्यांच्यान दिवाळी सोंपतली. दिवाळी जाली अशें जरी आमी म्हणलें तरी ताचें कवित्व मात बरेच दीस चलतलें शें दिसता.
अशें म्हणपाक कारण आसा. सद्याक आमची धाकटी दिवाळी नरकासूराच्या हातांत पावल्या. नरकासूरूच दिवाळेचेर शेक गाजोवंक लागला. कांय वर्सांनी सरकारान नरकासूर सुवाळो हो राज्योत्सव म्हणून मानून घेतलो तर मातूय अजाप जावचेली गरज ना. एका काळार खंय नरकासूर नांवांचो एक बळिश्ट राजा आशिल्लो. ताचें राज्यूय बरेंच शेकानशेक पातळिल्लें अशें म्हणटात. ताणें हजारांनी बायलांक आपल्या राजवाड्यांत बंदिवासांत दवरिल्ल्यो म्हणटात. एक दीस श्रीकृष्णान ताका मारून सगल्यांची सुटका केली. आतां तो राजा म्हणून बाकींच्या राजावरीच आसलो काय सामको आक्राळ विक्राळ आसलो तें कळप कठीण. पूण सद्याक तरी दिवाळे पयले रातीक नरकासूर सामको आक्राळ विक्राळ दिश्टी पडटा. तो तोंडांतल्यान उजो बी सोडटा आनी ताका मारपी कृष्ण सामको बारीकसो आसता. त्या कृष्णाक पळेतकूच काळकूटशी दिसता. खंय तो एदो व्हडलो नरकासूर आनी खंय हो किडकिडीत कृष्ण.
तरी पूण तो नरकासूराक मारतलो हाची खात्री आसताच. स्क्रिप्टूच तशी बरयिल्ली आसता न्ही. बरें एक आनी दोन नरकासूर येतात तर? डझनांनी नरकासूर आनी तांची सर्त, लाखांचीं इनामां. बाबड्या कृष्णाच्या नशिबांत मात फक्त फोव. ह्यो सर्ती पळोवंक हजारांनी लोक जमतात. ल्हान-व्हड, दादले बायलो सगलेच. पूण तांकां फक्त नरकासूर पळोवपाचो आसता. सगल्यांक आकर्शण नरकासूराचें. रातभर नाचून फांतोडेर केन्ना तरी नरकासूराक पेटोवपाचो आनी घरा वचून सुस्त न्हिदपाचें. दिवाळी केन्ना तरी दनपारची बी म्हणल्यार जागे जातकूच करपाची. सगलो सैमूच बदल्ला तशेंच आमचे सुवाळेय बदल्ल्यात. पयलीं फांतोडेर दिवाळी मनयताले आतां दनपरां मनोवंक लागल्यात. राज्यूच नरकासूराचें जालां ताका कोण कितें करतलो?
ह्या नरकासूराक लागून प्रदुशणाचो नरकासूर तयार जाता हाचें कोणाकूच भान आसना. भर रस्त्यार नरकासूराक जाळपाचो आनी ताचो सांगाडो थंयच सोडून वचपाचें. मागीर ताचे खिळे बी रस्त्यार पडून लोकांक जे त्रास जाता ताचें कोणाक पडिल्लेंच आसना. इतले दीस कांय हौशी भुरगे नरकासूराक घेवन नाचताले. आतां राजकारणी नरकासूराच्या मोगांत पडल्यात. नरकासूरा निमतान विरोधक एकठांय येवंक लागल्यात. नरकासूराचें राजकारण आतां सुरू जालां. नरकासूर माचयेर नाचूंक लागल्यात. ह्या वर्सा हाचो प्रत्यय आमकां पळोवंक मेळ्ळो. आतां दर एकलो राजकरणी दुसऱ्याक बोट दाखोवन ताका नरकासूर म्हणूंक लागला. पूण खरो नरकासूर कोण हें जनतेक बेस बरें खबर आसा. आतां हे नरकासूर कितले दीस युती करतात आनी तांची युती कितले दीस तिगून उरता तें पळोवचें पडटलें.
आतां विरोधक नरकासूरा निमतान एकठांय येतात तें पळोवन कांय राजकारणी नरकासूराक विरोध करूंक लागल्यात. ते खातीर तांका निमित्त मेळ्ळां तें म्हणल्यार नरकासूराक लागून भुरगे वेसनी जातात. तशें पळोवंक गेल्यार बाबड्या नरकासूराक बेठोच दोश. नरकासूराक लागून भुरगे वेसना कडेन वतात काय वेसनी लोकूच नरकासूरा फाटल्यान वतात ताचेर पयलीं अभ्यास जावंक जाय. वेसनाक जाय आशिल्लो दुडू उबारपाक नरकासूर करतात अशें म्हणल्यार अतिताय जावं नये.
कांय वर्सां फाटीं मडकय उद्देगीक वसणुकेंत कांय म्हयने काम करचें पडलें. वसणुके लागींच एक हॉटेल आसलें जंय हांव जेवंक वतालों. त्या हॉटेलांत एक वेगळी कूड आसली जंय कांय खास लोक बसताले. हॉटेलाचो धनी तांच्या मुखार एक बाटली दवरतालो. ती बाटली सोंपली म्हणजे थंय बशिल्लो चालीक लागतालो. ते बाटले परस चड तांकां कांयच मेळ नासलें. तांणी आनीक मागलें तर पयलीं दुडू फारीक करचे पडटाले. एक दीस सहज हॉटेल धनयाक विचारलें तेन्ना कळ्ळें ते पात्रांवाचे कार्यकर्ते. तांचे एके बाटलेचें बील पात्रांव फारीक करता. आतां तो पात्रांव कोण बी विचारपाचे भानगडींत हांव पडलों ना. पूण त्या तरणाट्यांची काकुळट दिसले बगर रावली ना. हे वेसनी जाल्यात आनी दुयेंसाक आमंत्रण दितात म्हणपाचें कळटालें. पात्रांव हांका वर्सभर सोरो दिवन आपले पांगेंत दवरता आनी वेंचणुके वेळार वापरून घेता हें कोणे सांगचेली गरज ना. तांकां अशे धुंदींत दवरले म्हणजे ते नोकरी बी मागूंक पावचे नात. आनी कायम आपणा कडेन उरतले हें पात्रांवाक खबर आसा. नरकासूराक लागून भुरगे वेसनी जातात अशें जेन्ना कोणूय म्हणटात तेन्ना हांवें पळयिल्लें हें चित्र दोळ्यां मुखार येता. आनी त्या भुरग्यांक वेसनाक लावपी पात्रांवांक नरकासूर म्हणपाचो काय? असो प्रस्न पडटा.
असले वेसनी भुरगेच नरकासूर नाचयतात. दोश कोणाक दिवपाचो नरकासूराक काय आपल्या सुवार्था खातीर तरणाट्यांक वेसनाक लावपी राजकारण्यांक? काय ह्या राजकारण्यांकूच नरकासूर म्हणपाचें? पळयात विचार करून. सद्याक नरकासूराचें कवित्व सुरूच उरूंक जाय. रोखड्योच वेंचणुको येवच्यो जाल्यात न्ही! जिल्हाे परिशद, म्युनिसिपालटी आनी उपरांत विधानसभा. म्हणटकूच तरणाट्यांक सांबाळचेंच पडटलें.

अभयकुमार वेलींगकार
9423884687