नमन गणपतीक !

भांगरभूंय | प्रतिनिधी

गजानना श्री गणराया…. हें म्होवाळ भक्तीगीत कानार पडलें काय समजूचें गणरायाचें देवूळ लागींच आसा. त्या आवाजाचे दिशेन पावलां पडपाक लागतात. रोजांच्या माळांनी, लायटीच्या रोशणायेन सजिल्लें, लखलखपी देवूळ दिश्टी पडटा आनी मन खोशेन भरून येता. देवळाची सुंदरकाय दोळ्यांत सांठोवन दिसता. प्रत्येक गांवांत एक तरी गणपतीचें देवूळ आसा. शेंकड्यांनी भक्त दर संकष्टी, विनायकी, मंगळारा विनायकाचें दर्शन घेवपाक वतात. तातूंत मंगळारा अंगारकी संकष्टी येत जाल्यार अक्षरशा हजारांनी भाविक गर्दी करतात. देवळा मुखार भक्तीमय वातावरण आसता. देवा वयली श्रद्धा दिश्टी पडटा. 

माघ म्हयन्यांतली विनायकी ही गणेश जयंती म्हूण मनयतात. अंदूं आयज 1 फेब्रुवारीक ती मनयतात.  हो गणपती जल्मल्लो दीस संबंद दीस. संबंद दीस देवळांत धर्मीक विधी चालू आसतात. दरेकलो देवाक 108 दुर्वा, 21 मोदक निवेद म्हूण अर्पण करता. दसणीचें तांबडें फूल मोरेश्वराच्या पायांर ओपतात. तशें केलल्यान ह्या जल्मांत पुण्य मेळटा, सकल संकश्टां पयस जातात, अशी भक्तांची श्रद्धा आसा. दुख्खाचेंय निवारण जाता. 

विघ्नहर्त्याचो चेरो म्हणल्यार हतयाचें मस्तक. ताका लागून तो हेर देवा परस वेगळो दिसता. ताचें हांसतें मुखामळ रेखीव दोळे तातूंतलीं चमक प्रत्येक भक्ताच्या मनांत आपुलकेची भावना निर्माण करता. ताका सुपायेदे कान, पोटार हतयाची लांब सोंड, ताचें पोट मोठे लोकांचे अपराध तो पोटांत घेता. ताचें वाहन हुंदीर. ताचे दोन मोठे दांत. चार हात. तो एकवीस मोदक एका घासांत खाता.  

खरेंच गणराया म्हणल्यार अडिल्ल्या नडिल्ल्या भक्ताचें दुख्ख समजून घेवपी, संकश्टां वेळार भक्ताच्या उल्याक धांवून येवपी. गणपती संवसाराक रंग, रूप आकार दिवपी. उर्जा दिवपी दैवत. तो सुखकर्ता, विद्येची देवता, कलेची ताका आवड. सुखाची पेरणी करपी. ओमकार नातीं घट बांदून दवरपी. सृश्टीचेर चैतन्य, खोस, उमेद रकोवपी.

गणेश जयंती हो व्हडलो उत्सव. गायन, किर्तन, भजन, विवीध सर्ती ते दीस आयोजीत करतात. दनपरां महाप्रसाद आसता. त्यावेळार हजारांनी भावीक भक्तीभावान येतात. देवळांनी रातच्या वेळार समाजीक, इतिहासीक नाटकां जातात. कांय कडेन पालखीय काडटात. भजनां गायत मिरवणूक काडटात. फोग लायतात.  अश्या ह्या सुखकर्त्याक कोटी कोटी नमन. मंगलमूर्ती मोरया. 

सिद्धी तिळवे

9158200956