भांगरभूंय | प्रतिनिधी
मनिषा कोयरालाः ‘फ्रॉम बिग स्क्रीन टू स्ट्रीमिंग प्लॅटफॉर्म्स’ विशयाचेर चर्चा
भांगरभूंय । प्रतिनिधी
पणजीः नटांनी फास्की मोडून नव्या माध्यमांचो प्रयोग करचो, अशें अभिनेत्री मनिषा कोयराला हांणी सांगलें. ती इफ्फींत ‘फ्रॉम बिग स्क्रीन टू स्ट्रीमिंग प्लॅटफॉर्म्स ह्या विशयाचेर चित्रपट निर्माते विक्रमादित्य मोटवाने हांचे कडेन चर्चा करताली. ही कार्यावळ कला अकादमीच्या सभाघरांत जाली.
ओटीटी प्लॅटफॉर्माचेर नाटक आनी मालिका वा चित्रपट ह्या दोनूय प्रकारांनी कलाकारां कडल्यान समान पांवड्याचेर यत्न, तयारी, प्रामाणीकपणां आनी मानसिकताय जाय. आपल्या 30 वर्सांचे कारकिर्दींत ‘हीरामंडी’ हो आपणें काम केल्लो सगळ्यांत व्हडलो सेट आशिल्लो. आपल्याक नाट्यघरांनी वचपाक खूब आवडटा, तशेंच घरांत बसून बरो कंटेंट पळोवपाक लेगीत खूब आवडटा. आपल्या मतान दोगांयचेंय आपलें वेगळे अशें म्हत्व आसा. ओटीटीचेर उत्कृश्ट सामुग्रीची गिरेस्तकाय उपलब्ध आसा. आपूण ओटीटी कंटेंट बिंज पळयतां, अशें सांगून तिणें प्लॅटफॉर्माचें तिका आशिल्ल्या आकर्शणा विशीं कबुली दिली.
शाहीद कपूर, आलिया भट्ट, वरूण धवन ह्या सारक्या खूबश्या कलाकारांनी पयलींच ओटीटी प्लॅटफॉर्माचेर प्रदर्शीत जाल्ल्या चित्रपटांनी काम केलां. जाका लागून ह्या माध्यमाचे वाडटे स्विकृतीची सुलूस दिता, अशें मनिषा आनी विक्रमादित्य मोटवाने ह्या दोगांयनी नदरेक हाडलें.
ओटीटी प्लॅटफॉर्मांचेर काम करप व्हडल्या पड्ड्या वयल्यान ‘कम डावन’ जाल्ले भशेन दिसता काय, अशें विक्रमादित्य मोटवानेन विचारलें तेन्ना मनिषान जाप दिली, नटांनी फास्की मोडची. एक अभिनेत्री म्हणून आपल्याक फक्त एकाच प्रकारांत मर्यादीत रावपाची इत्सा नाशिल्ली. अभिनयाच्या वेगवेगळ्या आंगांचो सोद घेवपाक जाय. ‘स्ट्रीमिंग’ एक गेम चेंजर जावपाचें आसा. ते नव्यो संदी दिता आनी ह्या मळार येवपी फिल्म निर्मात्यांक, लेखकांक आनी कलाकारांक मुखेल प्रवाहांत येवपाक उर्बा दिता, अशें मनिषान सांगलें.
दोनूय फॉर्मेटांतल्या आपल्या अणभवाचेर उलयतना मोटवाने हांणी सांगलें, फास्की मोडपाक आपल्याक खूब आवडटा. स्ट्रीमिंग प्लॅटफॉर्मांचेर भाशेची गजाल येता तेन्ना मात्शें चड स्वातंत्र्य मेळटा. ओटीटी प्लॅटफॉर्म चड स्वातंत्र्य दितात. मालिका प्रदर्शीत करपा खातीर बजेट आनी लांबाय मर्यादीत आसता, कथा चड भौसा खातीर आसच्यो पडटात, पूण निर्मिती आनी उपरांतची निर्मिती चड करून सारकीच आसा अशी म्हायती तांणी दिली.
मालिका दिग्दर्शीत करप मात्शें कठीण हें विक्रमान प्रामाणीकपणान मान्य केलें. ओटीटी ही भारतांत सामकी नवी गजाल आसा. तांतूत आमी ल्हव ल्हव वयर सरपाक जाय अशें तांणी मत मांडले. विक्रमादित्यान आपल्या निमाण्या उलोवपांत सिनेमाघरांनी सिनेमा पळोवपाचो अणभव सुदारपाची गरज आसा अशेंय मत उक्तायलें. गरजे भायर मध्यंतर आनी लांब जायराती प्रेक्षकांक आवडनात हाचेर ताणें भर दिलो. पूण व्हडल्या पडद्याचेर सिनेमाची जादू सदांच उरतली, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
