भांगरभूंय | प्रतिनिधी
पणजीः विधानसभेच्या सत्राच्या चवथे दिसाय कोफुसांव जालें. विशय न्याय प्रविश्ठ आशिल्ल्याचें सांगून नगर नियोजन मंत्री विश्वजीत राणे हांणी प्रस्नाक जाप दिवपाक न्हयकार दिल्ल्यान विरोधकांनी सभापती मुखार वचून बोवाळ केलो. ताका लागून विधानसभा १० मिण्टां खातीर स्थगीत जाली.
सत्राचे सुरवातेकूच श्री. राणे हांणी नगर नियोजन खात्याक विचारिल्ल्या प्रस्नाचो विशय न्यायालयांत प्रलंबीत आसा देखून विधानसभेच्या नेम आनी नेमां प्रमाण ह्या प्रस्नाक जाप दिवपाक मेळना अशें सांगलें. मात रेव्ह्युलेशनरी पक्षाचे आमदार विरेश बोरकार हांणी आवाज करपाक सुरवात केलो. टीसीपी ३९ अ चो विशय न्यायालयांत प्रलंबीत आसा अशें सांगून तारांकीत आनी अंतराकीत सगल्या प्रस्नांक जाप दिवपाक मंत्र्यान न्हयकार दिलो.
३९ अ हें प्रकरण न्यायालयांत प्रलंबीत आसा. मात ३९ अ चो कसलोच संबंध टीसीपी बोर्डाकडे येना. देखून मंत्री ही जाप कित्याक दिवपाक सोदना. म्हाका फक्त टीसीपी बोर्डांत वांगडी कोण आसात आनी तांणी कसले निर्णय घेतल्यात हाचीच जाप जाय. टीसपी बोर्ड हे न्याय प्रविष्ठ ना, असो युक्तीवाद बोरकार हांणी केलो.
म्हादय हो विशय लेगीत न्यायप्रविश्ठ आसा तरी लेगीत काल ह्या विशयाचेर सभाघरांत सविस्तर चर्चा जाली. आमी लोकप्रतिनीधी आसात देखून न्याय प्रविश्ठ आशिल्ले विशय चर्चा करपाक कसली हरकत आसा? असो प्रस्न विरोधी पक्ष फुडारी युरी आलेमाव हांणी करून नगर नियोजन खातेंच हें न्याय प्रविष्ठ जालां, असो आरोप तांणी केलो. मात नगर नियोजन मंत्री आपले भुमिकेचेर ठाम रावले. विशय न्याय प्रविश्ठ आशिल्ल्यान म्हाका जाप दिवपाक मेळना. जर तुमकां म्हायती जाय जाल्यार ती म्हायती हक्क कायद्या खाला मागयात अशी जाप दिली.
मंत्री आरती परती जाप दिता असो आरोप करुन विरोधकांनी सभापती मुखार धांव घेवन हे विशीं स्पश्टीकरण दिवपाची मागणी केली.
सभापतीन कोफुसांवां मजगतीं विधानसभेचें कामकाज सुरूच दवरलें. मात बोवाळाक लागून कामकाजांत आडमेळें येवपाक लागलें. उपरांत सभापतीन विधानसभा तहकूब केली. विधानसभेचे परत सुरू जाले उपरांत सभापतीन ह्या विशयांत रिसेसा उपरांत उत्तर दिता अशें आस्वासन दिले उपरांत विधानसभेचें कामकाज सुरळीत सुरू जालें.
विजय सरदेसाय हांणी मारली कूस
सभापतीच्या हौदांत सगळे विजय सरदेसाय वांगडा सगळे विरोधक गेल्ले. कामकाज सुरू दवरलें म्हण सगले विरोधक जमनीचेर बसले. मात विजय सरदेसाय हांणी मदींच कुस मारून ते भायर सरुन आपले सुवातेर वचून बसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
