भांगरभूंय | प्रतिनिधी
आमदार, तज्ञांची समिती करतली कायद्याचो फेरविचार
भांगरभूंय I प्रतिनिधी
पणजी : नगर नियोजन कायद्याचो नियाळ घेवपा खातीर आमदार तशेंच तज्ञांची समिती स्थापन जातली. फेरविचारा उपरांत 6 म्हयन्यां भितर नगर नियोजन कायद्यांत गरजेचे बदल करपाची घोशणा नगर नियोजन खात्याचे मंत्री विश्वजीत राणे हांणी केल्या. नगर नियोजन मंडळाचे बसके उपरांत ते पत्रकार परिशदेंत उलयताले.
आल्तिनो वयल्या रान भवनांत बिरेस्तारा नगर नियोजन मंडळाची बसका जाली. आमदार राजेश फळदेसाय, आमदार देविया राणे, मुखेल नगर नियोजक राजेश नायक, निलेश आमोणकार आनी हेर वांगडी बसकेक हाजीर आशिल्ले.
प्रतापसिंह राणे हे मुख्यमंत्री आसतना नगर नियोजन कायदो तयार जाल्लो. नगर नियोजन कायद्यांत दुरुस्ती जायत आसा. दरेक अधिवेशनांत एक वा दोन कलमांनी दुरुस्ती जाता. संतुळीत उदरगती खातीर नगर नियोजन कायद्यांत बदल जावपाची गरज आसा. आमदार तशेंच तज्ञांची समिती स्थापन जातली. कायद्याचो अभ्यास करून नियाळ जातलो. फुडल्या अधिवेशनांत नगर नियोजन कायद्यांत बदल जातलो, अशें विश्वजीत राणे हांणी सांगलें.
फोंडें, ताळगांव ओडीपी जातलें उक्तें
दुरुस्ती उपरांत म्हापशें, पणजी, ताळगांव, मडगांव आनी फोंडेंचो ओडीपी सुचोवणे खातीर उक्तो जातलो. हे विशींची अधिसुचोवणी जारी करपाक सांगल्या. दोन म्हयने सुचोवण्यो दिवपा खातीर आसतले. तीन म्हयन्यां भितर सगल्यो ओडीपी तयार जातल्यो.
कदंबा पठार, पेडणेंचो आराखडो तयार जातलो
कदंबा पठार तशेंच पेडणें म्हालाचो उदरगत आराखडो (सीडीपी) सगल्यांत पयलीं तयार जातलो. तज्ञां वरवीं हो आराखडो तयार जातलो, अशें मंत्री राणे हांणी सांगलें.
वास्तुशिल्पकार विनायक भरणे हांची नगर नियोजन मंडळाचेर सल्लागार म्हूण नेमणूक जाल्या.
ज्या वाठारांनी (लॅड लॉक्ड) वचपाक रस्ते नात, तांकां रस्तो दिवपाची तजवीज प्रादेशीक आराखडो 2021 मदीं आसतली. रस्त्या खातीर संबंदितांनी नगर नियोजन खात्या कडेन पयशे जमा करचे पडटले. उपरांत रस्तो करपाक मान्यताय मेळटली. नगर नियोजन खात्यांत अधिकाऱ्यांच्यो तीन वर्सां भितर बदल्यो जातल्यो. खंयचोच अधिकारी एके सुवातेर तीन वर्सां परस चड काळ रावचो ना, असो निर्णय घेतला.
निवासी शिक्षण संस्थांक 20% चड एफएसआय
निवासी शिक्षण संस्था खातीर 20 टक्के चड एफएसआय (फ्लोर स्टेट इंडेक्स) दिवपाक मंडळान मान्यताय दिल्या. राज्यांत निवासी विद्यालयांचो आंकडो वाडटा. निवासी विद्यालयांक चड जाग्याची गरज आसता. हाचे खातीर एफएसआय वाडोवन दिवपाचो निर्णय जाला. योग संस्था तशेंच ध्यान केंद्रां खातीर 5 टक्के चड एफएसआय मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
