नगर नियोजन आनी वीज खात्यान मागल्या म्हापशें पालिके कडेन सुवात

भांगरभूंय | प्रतिनिधी

इमारतीचें प्रकरण न्यायालयांत, तरीय बसकेंत जातली चर्चा

भांगरभूंय । प्रतिनिधी

म्हापशें : म्हापशें पालिकेच्या नव्या वेपारी संकुलांत सुवात दिवपाची मागणी नगर नियोजन खातें आनी वीज खात्यान म्हापशें पालिके कडेन केल्या. हे इमारतीचें प्रकरण उच्च न्यायालयांत आसा, तरीय ह्या दोनूय प्रस्तावांचेर शुक्रारा 21 नोव्हेंबराक जावपी पालिका मंडळाचे बसकेंत चर्चा जातली.

अलंकार थिएटरा कडल्या म्हापशें पालिकेच्या वेपारी संकुलाचें बांदकाम जीसूडा वतीन 20.59 कोटी रुपया खर्च करून केल्लें. सप्टेंबर 2019 त ह्या भोवउद्देशी प्रकल्पाचें काम हातांत घेतिल्लें आनी स वर्सांनी तें पुराय जालें.

हे इमारतीच्या बांदकामा वेळार आपले जमनीर गोंय राज्य नागरी उदरगत एजन्सीन (जीसूडा) अतिक्रमण केल्ल्याचो दावो करून भरणे नांवाचे व्यक्तीन जीसूडा आड उच्च न्यायालयांत याचिका दाखल केल्या. उच्च न्यायालयान जीसूडा आनी म्हापशें पालिकेक याचिकादारा कडेन तडजोड करपाचे निर्देश दिल्यात. मात अजून लेगीत हे संबंदांत पालिका वा जीसूडान ठोस निर्णय घेवंक ना. ताका लागून ह्या प्रकल्पाचें अधिकृत लोकार्पण जावंक ना.

नगर नियोजन खात्यान वरिश्ठ नगर नियोजक कार्यालया खातीर हे इमारतीचो पुराय दुसरो माळो दिवचो, अशी मागणी पालिके कडेन केल्या. जाल्यार वीज खात्याच्या कार्यकारी अभियंत्यांनी इमारतीच्या पयल्या माळ्या वयलीं 24 कार्यालयां दिवचीं, अशी मागणी पालिके कडेन केल्या. नगराध्यक्ष प्रिया मिशाळ हांचे अध्यक्षते खाला शुक्रारा 21 नोव्हेंबराक जावपी पालिका मंडळाचे बसकेंचे विशय पत्रिकेंत हे दोनूय प्रस्ताव नमूद केल्यात.

मात, जे इमारतीचें बांदकामूच न्यायालयांत आसा आनी भोगवटा प्रमाणपत्र (ओकुपंन्सी सर्टिफीकेट) अजून हे इमारतीक पालिके कडल्यान दिवंक ना, अश्या वेळार वयल्या सरकारी कार्यालयां कडल्यान आयिल्ले प्रस्ताव पालिका मंडळाचे बसकेंत चर्चे खातीर घेवपाची ताकतीक चल्ल्या.

मजगतीं, हाचे आदीं म्हापशें पालिका मंडळान खूब खेपे बेकायदो प्रस्तावांचेर मंजूर केल्ले थाराव नगरपालिका संचालनालयान भायर मारल्यात. तातूंत पालिकेचो महसूल आनी हेर अर्थीक गजाली संबंदांतले थाराव आशिल्ले. तरी लेगीत सध्याच्या पालिका मंडळा कडल्यान अशे तरेन कायदो मोडपी प्रस्ताव पालिका मंडळाचे बसकेंत चर्चे खातीर हाडपाचें आनी उपरांत सरकारा कडल्यान भायर मारपाचे लजेक पडपा सारके प्रकार चालूच दवरल्यात, हें वयल्या प्रस्तावां वयल्यान दिसून येता.

दुकान भाडें माफ करतली पालिका?

म्हापशें पालिका मंडळाचे बसकेंत अलंकार थिएटरा लागसार पालिकेचे मालकीच्या दुकानांचें उरिल्लें भाडें माफ करपाचो प्रस्ताव दवरला. सुमार 8.63 लाख रुपया हें दुकान भाडें आसा. भाडेंकार आशिल्ल्या एका नगरसेवकाच्या सोयऱ्यां कडल्यान हो अर्च पालिकेक केला. तशेंच रगताच्या नात्यां प्रमाण एका नगरसेवकाच्या नांवाचेर बाजारांतलें दुकान हस्तांतरीत करपाच्या प्रस्तावाचेर लेगीत हे बसकेंत चर्चा जातली. रगताच्या नात्यां संबंदींत दुकानां हस्तांतरणाचें साबार दुकानांचे अर्ज पालिके कडेन पडून आसात. मात ते अर्ज निकालांत काडिनासतना पालिकेन ह्या अर्जा संबंदांत विशेश रस दाखयला, अशी चर्चा पालिका मंडळांत चल्ल्या.