भांगरभूंय | प्रतिनिधी
वास्को: नुस्त्या मार्केटाची पळोवणी करतना मुरगांवचे नगराध्यक्ष गिरीश बोरकार हांणी नुस्तें विक्रेत्या संबंदी केल्ल्या एका उलोवपाक लागून तिडकल्ल्या नुस्तें विक्रेत्यांनी काल (मंगळारा) मुरगांव पालिका मंडळाची बसका सोंपले उपरांत नगराध्यक्षा कडेन हुज्जत घाली. मजगतीं, आपल्याक जें कितें म्हणपाचें आशिल्लें ताचो विपर्यास केला अशें सांगून बोरकार हांणी तांची समजूत काडपाचो यत्न केलो.
मुरगांव पालिका मंडळाची काल बसका आशिल्ली. त्या वेळार नुस्तें विक्रेत्यांनी आपलो वेवसाय बंद दवरून बसके कडेन मोर्चा वळयलो. सुमार दोन वरां तांणी थंय ठाण मांडलें. ह्या प्रकरणाची वास्को पुलिसांक म्हायती मेळ्ळे उपरांत पुलीस तैनात केले. उपरांत बसका सोंपले उपरांत तांणी नगराध्यक्षांचेर प्रस्नाचो भडिमार केलो.
नव्या नुस्त्या मार्केटांत वेवसाय करपाचो नासत जाल्यार त्या नुस्तें विक्रेत्यांनी घरा वच्चे अशें उलोवप खंयच्या आदाराचेर केल्ल्याचें तांणी विचारलें. तें मार्केट आमचें आसा. आमी जो निर्णय घेवं तो निमाणो आसतलो अशें विक्रेत्यांनी सांगलें. बोरकार हांणी आपली बाजू मांडपाचो यत्न केलो. पूण नुस्तें विक्रेत्यो आयकून घेवपाचे मनस्थितींत नाशिल्ल्यो.
मजतगीं, आपणाक जें कितें म्हणपाचें आशिल्लें ताचो विपर्यास जाला. थंय 250 नुस्ते विक्रेत्यां खातीर सुवात आसा. थंय नुस्तें विकपाक बसले नात जाल्यार ती सुवात आमी दुसऱ्याक दितले. कारण मुरगांव पालिकेक महसूल जाय. ती सुवात रिती दवरल्यार महसूल बुडपाची शक्यताय आसा, अशें स्पश्टीकरण बोरकार हांणी दिलें. उपरांत क्रिस्तोडियो डिसोझा हांणी ह्या प्रकरणांत हस्तक्षेप करून वातावरण शांत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
