भांगरभूंय | प्रतिनिधी
रवी नायकाच्या मरणान पोरण्यो यादी जाग्यो जाल्यो. गोंयच्या राजकारणांत तो खऱ्या अर्थान एक व्हड फुडारी आशिल्लो. मुख्यमंत्री आनी शेतकी मंत्री म्हणून काम करतालो आनी राज्याच्या प्रशासनाचेर आनी लोकांचेर आपलें वर्चस्व दवरतालो. लोकसेवे खातीर ताची तळमळ, तळागाळांतले संबंद आनी वंचितांक सशक्त करपाची वचनबद्धताय ताका गोंयच्या राजकी मळार एक मानाची सुवात मेळोवन दिल्या.
ताच्या मरणा आदीं तीन दीस हांव ताका मंत्रालयांत कॉरिडोराचेर मेळ्ळो. ताणें हांसून म्हज्यो मिश्यो अजूनय अभिनेतो कमल हसनाच्या मिश्यां भशेनूच आसात म्हाणपाची म्हाका याद करून दिली. ताचो म्हज्या जिविताचेर म्हत्वाचो परिणाम जाला आनी ताका वळखुपाचो आनी ताचे वांगडा काम करपाचो अणभव मेळ्ळो म्हूण हांव उपकारी. ताचो वारसो गोंयांत आनी ताचे भायर जायत्या जाणांक प्रेरणा दितलो.
ल्हानपणां सावन ताचे कडेन हांव जोडिल्लो आसा. तरणेपणांत तो सक्रीयपणान व्हॉलिबॉल खेळटालो तें हांवें पळयलां. व्हॉलिबॉलांत ताणें राष्ट्रीय पांवड्यार गोंयचें प्रतिनिधित्व केलां.
फोंडें तिस्कार तो ‘रवी बार’ नांवाचें बार चलयतालो आनी तिस्कार लामार्टीन इमारतींतल्या फ्लॅटांत तो रावतालो. पूण हांगा ताचें निमाणें ध्येय नाशिल्लें हे तेन्ना सावनच कळटालें. तो महत्वाकांक्षी आशिल्लो आनी ताका जिणेंत मुखार वचपाची इत्सा आशिल्ली. मगोचो वांगडी जावन आनी उपरांत मगो युवा संघटणेचो अध्यक्ष जावन ताणें फोंड्यां आनी गोंयभर जायत्यो कार्यावळी हातांत घेतल्यो. ताका प्रोत्साहन दिवपी आनी आदार दिवपी श्रीमती शशिकला काकोडकार हांकां तो खूब लागीं आशिल्लो.
भुरगेपणांत फोंडें वाठारांतल्या थळाव्या वाड्यांचेर राजकी बसकांनी ताचे वांगडा हांव सदांच आसतालों. तो म्हाका मध्यान रातीं 12 वरां उपरांत घरा सोडटालो. हांव थळावो रिपोर्टर आशिल्ल्यान ताचे भाशण आनी बातमी छापतालों. मुंडकार आनी कुळांचो हुस्को आशिल्ल्यान ताणें गोवा दमण आनी दीव मुंडकार कूळ संघटणेची सुरवात केली. संघटणेचो एक म्हत्वाचो पदाधिकारी हांव आशिल्लों. रवी नायक हांणी फोक्सवॅगन बीटल गाडी घेतिल्ली आनी आमी काणकोण सावन पेडणें मेरेन मुंडकार कुळांच्यो कागाळी सुटाव्यो करीत भोंवताले.
उपरांत ताचें पुष्पा चिपकारा कडेन व्हड थाठांत लग्न जालें. वयनी आमकां बरी वागणूक दिताली. उपरांत रितेश आनी रॉय हीं दोन भुरगीं जालीं. वाठार खुशाल आशिल्लो.
म्हजो 25वो वाडदीस आयलो तेन्ना रवी नायक हांणी फुडाकार घेतलो आनी म्हजो 25वो वाडदीस फोंड्यां भव्य रितीन मनयलो.
ताचे वांगडा जेसींत काम करपाची संद मेळ्ळी. अध्यक्षपदाच्या काळांत 12 ऑगस्टाक भाऊसायब बांदोडकाराचे पुण्यतिथी दिसा शाळेंतल्या भुरग्यां खातीर धांवपाची सर्त आयोजीत करपाची सुचोवणी ताणें केली, ती आमी भव्य रितीन घडोवन हाडली. हांव प्रकल्प वेवस्थापक आशिल्लो. ही फोंडा जेसीची वर्सुकी कार्यावळ जाल्या अशें सांगपाक म्हाका अभिमान दिसता.
सर्गेस्त मुकूंद नायक मगोचे अध्यक्ष आसतना रवी नायकान फोंड्यां मगोची भव्य रॅली घडोवन हाडली आनी ताका लागून फोंडें मतदारसंघांत मगोचें बळ आनीकय वाडलें. ताच्या येसस्वीपणाची आनी निर्विवाद फुडारपणाची ही पावतीच कशी आशिल्ली. तेन्ना सावन ताणें फाटीं वळून पळोवंक ना. ताणें फोंडें नगरपालिकेचो नगरसेवक, नगराध्यक्ष, आमदार, खासदार, मंत्री आनी मुख्यमंत्री म्हणून काम सांबाळ्ळां.
जेन्ना हांव म्हायती आनी प्रसिध्दी खात्यांत कामाक लागलों तेन्ना तो राज्याचो म्हायती मंत्री आशिल्लो.
जॉन आगियार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
