भांगरभूंय | प्रतिनिधी
पणजी : नगरपालिका वाठारांत घर दुरूस्तीचे सोपस्कार सुटसुटीत करतना परवानो ३ दिसांनी दिवपा विशींचें परिपत्रक शार उदरगत खात्यान जारी केलां. प्रमाणपत्रां जोडून अर्ज केले उपरांत ताचेर ३ दिसांनी निर्णय घेवपाचे आदेश पालिकांक दिवचे पडटले. नवें घर बांदपा खातीर हें परिपत्रक लागू जावचें ना. विकसीत गोंय करपा खातीर घर धनयांच्यो दुरूस्तीच्यो कटकटी उण्यो करपा खातीरचें हें पावल आसा, अशेंं मुख्यमंत्री डॉ. प्रमोद सावंत हांणी म्हणलां.
दुरूस्तीचो परवानो ३ दिसांनी मेळपा खातीर ह्यो अटी आसात :
-फाटल्या ५ वर्सांची घरपट्टी फारीक करची पडटली
-दुरूस्तीचो आराखडो, घराचो फोटे आनी आर्कीटॅक्टाचें प्रमाणपत्र
म्हापालिका आयुक्त/पालिका मुख्याधिकार्यान अर्जाचेर ३ दिसांनी निर्णय घेवन अर्जदाराक कळोवंक ना, जाल्यार परवानो दिला, अशें गृहीत जातलें. हाका लागून अर्जाचेर निर्णय कळोवंक ना जाल्यार अर्जदारान ३ दिसां उपरांत दुरूस्तीचें काम करपाक सुरवात करची, अशें परिपत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
