भांगरभूंय | प्रतिनिधी
पणजी ः नगरगांवांतल्या श्रवण देवीदास बर्वेच्या खून प्रकरणांत वाळपय पुलिसांनी केल्ल्या चवकशेक गती मेळ्ळ्या. ह्या प्रकरणांत वासुदेव ओझरीकार (42, आंबेडे -नगरगाव) हाका अटक केल्या. ह्या प्रकरणांत पुलिसांक कांय म्हत्वाची म्हायती मेळिल्ल्यान आतां तपासाक गती मेळ्ळ्या. ह्या खुनाचे कारण सोदून काडपा खातीर पुलिसांनी नेटान चवकशी करपाक सुरवात केल्या.
ह्या प्रकरणांत काल वाळपय पुलिसांनी 18 जाणांक चवकशे खातीर ताब्यांत घेतिल्लें. उपरांत तातुंतल्या 15 जाणांक सोडले आनी तिगांक पर्वरे पुलीस स्टेशनाचेर चवकशी खातीर हाडले. पुलीस थळाव्यांक ह्या प्रकरणांत घुस्पोवपाक सोदता, खरो खुनी कुशीकूच उरलां अशें म्हणीत थळाव्यांनी वाळपय पुलीस स्टेशनाचेर मोर्चा व्हेलो. हांकां जो मेरेन सोडिना तो मेरन पुलीस स्टेशना वयल्यान हालचें ना, अशी शिटकावणी थळाव्यांनी दिल्ली. रातीं उसरां मेरेन सुमार शंबरेक लोक थंय आशिल्लो. मजगतीं पुलिसांनी तिगांकूय चवकशी जाल्या उपरांत सोडटा म्हूण उतर दिले. उपरांत तांतूतल्या दोगांक सोडले आनी एकल्याची खोलायेन चवकशी सुरु केली.
आतां ह्या प्रकरणांत तपास करुन पुलिसांनी वासुदेव ओझरीकार (42, आंबेडे -नगरगाव) हाका अटक केल्या. आनी फुडलो तपास चालू आसा.
मजगतीं, कांय दिसां आदीं श्रवण बर्वे हाची दुबावीत स्थितींत कूड मेळ्ळिल्ली. शवविश्लेशणाच्या अहवालांत ताचो गळो दाबिल्ल्यान ताका स्वासाचो त्रास जाल्ल्यान मरण आयिल्ल्याचें स्पश्ट जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
