भांगरभूंय | प्रतिनिधी
नवी दिल्ली, खबरां संस्था: अंदूं आतां मेरेन ११४ दिसांनी १६१ नक्षलींक सोंपयल्यात. सुमार ६०० जाण शरण आयल्यात. २०२४ वर्स ह्या पुराय वर्सा २९६ आनी २०२३ वर्सा ५६ जाणांक मारिल्ले. म्हळ्यार दोन वर्सांनीच नक्षल्यां आड घातकी कारवायेंत ५२८ टक्क्यांची वाड जाल्या. गृहमंत्रालया कडेन संबंदीत सुत्रा प्रमाण २०१८ वर्सा ११ राज्यांतले १२६ जिल्ले नक्षलग्रस्त आशिल्ले. २०२४ मेरेन ते उणे जावन ३८ जाले. सगल्यांत प्रभावीत ६ जिल्ह्यां मदल्या ४ छत्तीसगड, १ महाराष्ट्र, १ झारखंडांत आसात. हेर ३२ जिल्ले हे नदरेन ‘मध्यम’ वा मर्यादीत श्रेणीत मोडटात. आतां हें नक्षली आंदोलन मेजक्याच भागापुरतें उरलां. अशा भागांतूय सुरक्षा दळ आनीक घटमूट जाता.
तज्ञांनी म्हणलें: डिजिटल आघाडी खातीर शार भागांत भरती सुरू
अशे तरेच्या प्रकरणां कडेन संबंदीत सुरक्षा विश्लेशकांचे नदरेन डिजिटल आघाडी हीं नक्षली नवें आव्हान आशिल्ल्याचें मानतात. आतां लढाय फकत रानांतूच न्हय मोबायल, लॅपटॉपांच्या स्क्रिनीचेरूय जाता. नक्षली संघटना वेगान डिजिटल प्रचार आनी ऑनलायन भरती वरवीं शारी तरणाट्यांक जोडपाचो यत्न करतात. महाविद्यालयीन विद्यार्थी, तरणाट्यांक लक्ष्य करतात.
माओवादाच्या आड सुरक्षा दळाचें अभियान नेटान सुरू जरीं आसलें तरी सरकारान चर्चेचे मार्ग पुरायेन बंद करूंक ना. गृहमंत्रालयाचे वरिश्ठ अधिकार्यान म्हणलें, नक्षलींनी हिंसा सोडल्यार सरकार चर्चेक तयार आसा.
नक्षलींच्या आड मोहिमेंत सुरक्षा दळांची घटमूट रणनीती उक्ती जाल्या. अंदूं आतां मेरेन एक जवान शहीद जाल्ल्याचे घडणुकेंत प्रत्युत्तरांत ११ नक्षलींक सोपयले. २०२५ वर्सा आतां मेरेन ६०० नक्षलींनी आत्मसमर्पण केलें. हो आंकडो २०२४ च्या पुरात वर्साचो ४७५ परस चड आसा. २०२३ वर्सा हो आंकडो २६८ आशिल्लो. महळ्यार दोन वर्सांनी १३०० माओवादी मुखेल प्रवाहांत परतले.
बंकर सारकिल्ल्या १२ नक्षली अड्ड्यांक केले उध्वस्त …
सुरक्षा दळान बिजापूरच्या दोंगरार कॉंक्रीट स्लॅबान केल्ले एके कुडींत १२ नक्षली ठिकाणांक नश्ट केले. १६० चौरस फूट आकारा सारके बंकरच्या स्वरूपांतल्यान हें ठिकाण आशिल्लें. थंयच्या स सौर प्लेट, दोन नक्षलींचे युनिफॉर्म, दोन फॅन आनी हेरसामान जप्त केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
