भांगरभूंय | प्रतिनिधी
पणजीः गोंयचे जमनीचे आराखडे डिजीटायज करपी शार वस्तींचें राष्ट्रीय भुस्थानीक गीन्यान आधारीत जमीन सर्वेक्षण (नक्शा) ह्या उपक्रमा खाला तीन पालिकांचें एरीयल सर्वेक्षण पुराय जालां. जाल्यार दोन पालिकांनी मुळाव्या पांवड्यार चाचपणी करपाचे प्रक्रीयेक सुरवात जाल्या. पणजी महानगर पालिका, कुंकळ्ळी आनी मडगांव पालिकेचो ह्या उपक्रमांत आसपाव आसा, अशी म्हायती केंद्रीय ग्रामीण उदरगत मंत्रालयाच्या जमीन संसाधन विभागान दिल्या.
केंद्रीय ग्रामीण उदरगत राज्य मंत्री डॉ. चंद्रशेखर पेमानी हांणी लोकसभेंत विचारिल्ल्या प्रस्नाक लेखी जाप दिल्या. नक्सा उपक्रमा खाला २९ राज्यांतल्या १५७ पालिका वाठारांची निवड केल्ली. हातूंत उत्तर गोंयची एक पालिका आनी दक्षीण गोंयच्यो दोन पालिकांचो आस्पाव आसा.
उत्तर गोंयांत पणजी महानगरपालिकेची जाल्यार दक्षीण गोंयात कुंकळ्ळी आनी मडगांव पालिकेची निवड नक्शा उप्रकमा खातीर जाल्या. ह्या उपक्रमा खाला पणजी, कुंकळ्ळी आनी मडगांव ह्या तीनय पालिकांचो एरीयल डेटा एकठांय करपाचें काम पुराय जालां. मात मुळाव्या पावंड्यार चाचपणी करपाचें काम सद्या चालू उरलां. पणजी म्हानगरपालिकेचे २ टक्के मेरेन प्रक्रीया पुराय जाल्या, कुंकळ्ळी पालिकेची ५ टक्के आनी मडगांव पालिकेची प्रक्रीया अजून सुरू जांवक ना.
१८ फेब्रुवारी २०२५त नक्शा उपक्रमाचे मुख्यमंत्री डॉ. प्रमोद सावंत हस्तुकीं राज्यांत उक्तावण जाल्लें.
ह्या उपक्रमा खाला जमीन सर्वेक्षण कागदपत्रांचें डिजीटायजेशन वा नुतनीकरण करतले. जीआयएस सर्व्हेच्या आधारार सर्वेक्षण तशेंच जमीन कागदपत्रांचें नुतनीकरण करतले. जमिनीचें क्षेत्रफळ, लांबी, रुंदी आनी ताचेवेलीं बांदकामां स्पश्ट जातलीं. बांदकाम परवाने, उदका पुरवण, अतिक्रमण, आपत्ती वेवस्थापन, कर आकारणी तशेंच उदरगती खातीर नियोजन करप हें जीआयएस सर्वेक्षणा उपरांत सुरळीत जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
