भांगरभूंय | प्रतिनिधी
नंबर्स. हांव तुमच्या मोबायलाचो नंबर म्हणिना हा. पूण मनीस जल्माक येता तेन्ना ताचे बरोबर आसता ते नंबर्स, जीण
भर आमची फाट सोडिनात. संवसारूय आयज फक्त नंबर पळोवपाकूच समाधान मानता अशें दिसता. मनीस जल्माक आयलो की ताची पत्रिका पळयतात. ताका कितले गूण आसा तें पळयतात. तो खंयच्या वेळार जल्मलो तें पळयतात. ताची जल्मतारीख पळयतात. कांय लोक तर तेरा तारीख बी आयली जाल्यार अशूभ अशेंय समजतात. पूण संवसारांत तेरा तारखेक जल्माक आयिल्ले कितलेशेच लोक आयज नामनेक पावल्यात. तरी प्रस्न तो ना. फुडे आमी शाळेक वतात. थंय आमका रोल नंबर मेळटा. मागीर परिक्षेक तुमकां कितले मार्क मेळटा ताचेर तुमी कितले हुशार तें थारायतात. खेळांत जशे धांवपांत, लांब उडयेंत वा आनीक खंयच्याय खेळांत तुमी पयल्या तिनां भितर खंयचे सुवातेर आयल्यात ताचेर तुमी कितले चपळ आसात तें थारायतात. ते भायर शाळेंत गाण्याची सर्त, वेशभुशा सर्त हातूंत पयलो कोण आयलो हेंच पळयतात. शाळेचो निकाल आयलो की, कोण कितल्या नंबरान पास जालो हें पळयतात. टक्केवारी पळयतात. मागीर धावेचे, बारावेचे टक्केवारीक तर खूब म्हत्व दितात. कारण ताचेरूच तुमकां मुखार कॉलेजींत अॅडमिशन मेळटा. तुमचो फुडार थारता.
मुखार जॉबाक वता तेन्ना इंटरव्हयूक आमी कितले नंबर मेळयल्यात तेंच पयलीं पळयतात. थोडे कडेन ताचेरूच तुमचो पगारूय थारता. मागीर आमी गाडी घेतनाय आमकां मेळटा तो गाडयेचो नंबर. नवीन गाडी घेतली की लोकूय पयली विचारतात तो नंबर. मटक्याक लावपाक…! सुरवातेक मोबायल आयिल्ले तेन्ना अमूक कंपनीच्या नांवान मोबायलाची वळख जाताली, आतां तांकांय बी वेगळ्यावेगळ्या माॅडेलाचे नंबर्स आयल्यात.
मागीर आमचे बरोबर आसता मोबायल नंबर, आधार कार्ड नंबर, व्होटींग कार्ड नंबर, पॅन कार्ड नंबर, बँक अकावंट नंबर, एटीएम कार्ड नंबर, हावज नंबर, पीन नंबर. नंबर, नंबर आनी फक्त नंबर…! तातूंत आतां आनीक एक नवो नंबर सुरू जाला तो म्हणल्यार ओटीपी नंबर…
आयज राजकारण्याक तर आपणाक खंयच्या वाठारांतल्यान कितलीं मतां मेळटलीं हाचीच काळजी आसता. कारण तांकां सत्तेर बसतलो जाल्यार गरज आसता ती चडांत चड नंबरांच्या मतांची.
सांगपाचे म्हणल्यार जिणभर हे नंबर आमची फाट सोडिनात. कांय वेळार लोकूय पळयतात ते फक्त नंबर्स. पूण कांय मळार, खास करून कलेच्या मळार नंबर्सा परस तुमी केल्लें सादरीकरण, वा तुमी लोकांच्या काळजांत मेळयिल्ली तोखणायेची, शाबासकेची थाप चड म्हत्वाची आसता. आनी ते नंबर्स परस्पर, काळजांतल्यान आमकां समाधान दितात.
तर अशे हे नंबर्स…! जिणेच्या दरेका पावलार आमकां आपली जाणविकाय करून दितात. आपले अस्तित्व दाखयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
