भांगरभूंय | प्रतिनिधी
एस. एस. धेंपो महाविद्यालयान आंतर म्हाविद्यालयीन दादल्यांचे क्रिकेट चॅम्पियनशीप वस्तादपण मेळयलें. ही सर्त गोंय विद्यापिठा वतीन आयोजीत केल्ली.
एस. एस. धेंपो कॉलेज ऑफ कॉमर्स अँड इकॉनॉमिक्स कुजिरान किताबी लडटींत सरकारी म्हाविद्यालय कला, विज्ञान आनी वाणिज्य खांडोळेंक 86 धांवड्यांनी हारयल्या.
निमाणे मॅचींत धेंपो म्हाविद्यालयान पयली बॅटींग केली. तांणी निर्धारीत 20 ओवरींनी 5 बाद 216 धांवड्यांचो दोंगर उबारलो. आनंद तेंडुलकरान 30 बॉलांनी 79 धांवड्यांची खेळी केली, जाल्यार सागर वंतामुरीन 26 बॉलांनी 49 धांवड्यो करून हें मॅचींत पर्जळींत खेळी केली.
खांडोळा म्हाविद्यालया वतीन बॉलिंगेंत प्रथमेश कुंकळकारान 37 धांवड्यांत 1, रिषभ गांवकारान 31 धांवड्यांत 1 आनी रिषिकेश नायक हांणी 11 धांवड्यांनी 1 विकेट घेतली.
218 धांवड्यांचो फाटलाव करपी खांडोळा म्हाविद्यालयाची 5वे ओवरीं मेरेन 2 बाद 46 धांवड्यो अशी स्थिती जाली. तांणी थारावीक अंतरान आपले विकेटी वगडावपाक सुरवात केली. निमाणे तांचो डाव 20 ओवरींनी 9 बाद 131 धांवड्यांचेर सोंपलो. हातूंत प्रसाद हारले आनी प्रथमेश सावंत हांणी अनुक्रमे 11 बॉलांनी 26 आनी 10 बॉलांनी 23 धांवड्यांचें योगदान दिलें. सागर वंतामुरीन बॉलिंगेंत 22 धांवड्यो दिवन 5 विकेटी घेतल्यो.
वैयक्तीक इनामांत उत्कृश्ठ बॅट्समन म्हूण धेंपोचो आनंद तेंडुलकार, उत्कृश्ठ बॉलर खांडोळे म्हाविद्यालयाचो प्रसाद हारले आनी मॅन ऑफ द मॅच धेंपो म्हाविद्यालयाचो सागर वंतामुरी हांची निवड जाली. हे सर्तींत वट्ट 40 पंगडांनी वांटो घेतिल्लो.
मुखेल सोयरे रामराव सूर्या वाघ (सहयोगी प्राध्यापक आनी कार्यावळ संचालक, गोंय बिझनेस स्कूल, गोंय विद्यापीठ कम्प्युटर सायन्स डिसिप्लीन) आनी मुखेल सोयरे प्रा. मनोज कामत (प्राचार्य, धेंपो म्हाविद्यालय) हांणी इनामां वांटप सुवाळ्याक हाजीर रावन वस्ताद आनी उपवस्ताद पंगडाक करंड भेटयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
