भांगरभूंय | प्रतिनिधी
कुजिराच्या व्ही धेंपो कला, विज्ञान आनी वाणिज्य उच्च माध्यमीक विद्यालयान फायनलींत पिलारच्या फादर आग्नेल हायस्कुलाक 5-0 अशा गोल फरकांनी हारोवन खेळां आनी युवा वेव्हार संचालनालयान आयोजीत केल्ली चल्यांची तिसवाडी तालुको सुब्रतो मुखर्ज फुटबॉल सर्तीचें वस्तादपण जोडलें. सर्त सांताक्रूझ फुटबॉल मैदानाचेर जाली.
पयल्या अर्दांत व्ही धेंपो उच्च माध्यमिकान 3-0 अशी आघाडी घेतिल्ली. वेदांत गांवकारान पांचव्या मिनटाक कॉर्नर किकीचेर गोल करून धेंपोचें खातें उगडलें. ते उपरांत 15व्या मिनटाक मेहबूब तांबेकारान गोल करून आघाडी 2-0 अशी केली. जाल्यार 25व्या मिनटाक मेहबूबान आपलो दुसरो आनी पंगडाचो तिसरो गोल केलो.
दुसऱ्या अर्दांत लेगीत धेंपोन आपलो शेक दवरलो. ह्या अर्दांत ताणें आनीक दोन गोल केले. आशोनान 40व्या मिनटाक गोल करून स्कोर 4-0 केलो. 61व्या मिनटाक कायदेन फालेरोन गोल करून 5-0 अशी व्हड आघाडी घेवपाक मजत केली.
तिसवाडी तालुको जैतिवंत धेंपो पंगड आतां जिल्हो पांवड्या वयले फायनलींत दिवचल तालुको जैतिवंत पंगडा आड म्हापशेंच्या धुळेर मैदानाचेर खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
