भांगरभूंय | प्रतिनिधी
धेंपो कला, विज्ञान आनी वाणिज्य उच्च माध्यमिकाच्या पंगडान फुटबॉल खेळांत वट्ट तीन वस्तादपणां जोडलीं. ताणें खेळां आनी युवा वेव्हार संचालनालयान आयोजीत केल्ले 19 वर्सां पिराये सकयल्या गटांत, 17 वर्सां पिराये सकयल्या सुब्रतो करंड आनी 18 वर्सां पिराये सकयल्या रिलायन्स करंड सर्तींत वस्तादपण जोडलें.
19 वर्सां पिराये सकयल्या गटांतले फायनलींत ताणें गुडी पाड्डेच्या दामोदर उच् माध्यमीक पंगडाक 3-0 अशा फरकान हारोवन वस्तादपण जोडलें. मॅच बांबोळीच्या अॅथलेटीक स्टेडियमाचेर जाली. मॅचीच्या 17व्या मिनटाक धेंपोन आघाडी घेतली. हो गोल स्वेव्हेल फुर्तादोन केलो. ते उपरांत 55व्या मिनटाक आर्यन पॉलान गोल करून आघाडी 2-0 अशी वाडयली. तिसरो आनी निमाणो गोल 65व्या मिनटाक मॅक्नेल डायसान करून आपल्या पंगडाचें जैत निश्चीत केलें.
ते पयलीं आंतरविभागाचे फायनलींत धेंपोन हळदोणच्या सेंट थॉमस उच्च माध्यमिकाच्या पंगडाक 2-0 असा हारयलो. स्वेव्हेल फुर्तादो आनी मॅक्नेल डायस हांणी दरेकी एक गोल केलो.
विभागीय पांवड्या वयले फायनलींत धेंपोन पिलारच्या फादर आग्नेल उच्च माध्यमीक पंगडा आड 3-0 अशें जैत जोडलें. अॅसमोन व्हिएगासान धेंपोचें खातें उगडलें. नॅथन कुतिन्होन दुसरो जाल्यार आर्यन पॉलान तिसरो गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
