धूव कोण, आवय कोण?

भांगरभूंय | प्रतिनिधी

दोनूय भाशांनी कांय समान उतरां आसात. तांचें व्याकरण, उच्चार, साहित्यीक परंपराय वेगळी.

अामकां वाद घालपाचो खूब सोंस. खंयचेय गजाली वयल्यान आमी रोखडेच भावूक जातात आनी हिंसक आंदोलन करतात. भावना दुखावल्यो जाल्यार शांतपणान कितें तें करूं येता, कोर्टांत वचूं येता, आमरण उपास करूं येता…!! तातूंत श्रद्धेक धपको दिवपी विरोधी विचारसरणेचो आसल्यार मागीर विचारूंच नाकात. कांय राजकी फुडारी मुद्दाम वादग्रस्त उलयतात. घडये तांकां त्याच कामा खातीर नेमिल्ले आसतात. पुलिसांक गस्त घालपाचे जागे वाटून दिल्ले आसतात, तेच तरेन त्या फुडाऱ्यांक पक्ष, नेते वाटून दिल्ले आसतात. थोडे प्रसिद्धी, फायद्या खातीर वादग्रस्त उलयतात. थोडे फकांडांनी वा नकळटा उलोवन वतात तेंय वादग्रस्त थारता. आतां अभिनेतो कमल हसनाचेंच पळयात. 5 जूनाक ताचो ‘ठग लायफ’ हो नवो सिनेमा येता. 24 मे दिसा चेन्नयंत सिनेमाच्या पदांचें लोकार्पण करतना कन्नड अभिनेतो शिवा राजकुमार हाचे कडेन बोट दाखोवन ताणें म्हणलें, ‘शिवा म्हज्या कुटुंबांतलोच कसो. म्हणुनूच तो हांगा आयला. हांवें म्हजें भाशण जीण, नातीं आनी तमिळ ह्या मुद्द्यां वयल्यान सुरू केलें. शिवा, तुमची भाशा (कन्नड) तामिळींतल्यान तयार जाल्या. म्हणटकच तूंय आमचोच एक भाग.’ ह्या विधाना उपरांत उजो पेटला तो अजून पालोवंक ना.
कर्नाटक फिल्म चेंबर ऑफ कॉमर्सान सिनेमाचेर राज्यांत बंदी घाल्या. माफी मागली जाल्यारूच आमी सिनेमा दाखोवपाक परवानगी दितले अशे तांणी म्हणलां. ते वटेन कांय कन्नड भाशा संघटणांनी भाशीक भावना दुखिल्ल्याचें सांगीत सिनेमाचे पोस्टर पिंजल्यात. जाहीर माफी मागिना जाल्यार हो सिनेमा थेटरांनी कसो लागता, तेंच पळयतां, अशी शिटकावणी तांणी दिल्या. आतां ह्या उज्यांत काल कमलान स्वता पॅत्राॅल ओंतलां. ‘भारत हो लोकशाही देश. म्हजो कायद्याचेर विस्वास आसा. केरळ, आंध्र प्रदेश आनी कर्नाटका वयलो म्हजो मोग सामको अस्सल. सदांच मोग जिखता. म्हाका धमक्यो दिल्यात. पूण जर हांवें चूक केल्या तरूच हांव माफी मागतलों. हांव बरोबर आसा जाल्यार माफी मागचो ना’ अशें ताणें म्हणलां. देखून वादाचो धुंवरेंवपी उजो आयज शेनवार, आयतारा पेटपाक शकता. सिनेमा येवचे पयलींच लोकप्रीय जावचो म्हूण कांय जाण वाद मुद्दाम तयार करतात. आमी भारतीय संवसारांत सगल्यांत संवेदनशील म्हणटकच उंचाबळ जातात आनी बशिल्ले कडेन फ्लाॅप थारिल्लो सिनेमा पसून गाजता. कमलान हो तसलोच प्रकार केला काय तो चुकून उलोवन गेला, तें ताकाच खबर. खंयची भाशा खंयचे भाशेंतल्यान आयल्या तें सांगपाक कमल भाशातज्ञ न्हय. तो हुशार, अभ्यासू, खांपो वाचक, हातूंत वाद ना. तो बऱ्यांतलो बरो अभिनेतो हें ताचे विरोधक पसून मान्य करतले. म्हणटकच कमलान हो वाद आनीक वाडोवपाची गरज नाशिल्ली.
सिनेमा हो वेवसाय. एका राज्यान ताचेर बंदी घालप, हो निर्मात्याक व्हडलो धपको. दिग्दर्शन करपी मणीरत्नम, कमल हसन सिनेमाचे निर्माते आसात. उदयनिधी स्टेलीनूय एक निर्मातो. ए. आर. रेहमान संगीतकार. 300 कोटींच्या ह्या सिनेमाची हवा जाल्या, पूण कर्नाटकांत तो दाखोवप ना, हो रसिकांचेर अन्याय. जाहीर माफी होच आतां उपाय उरला. कारण फक्त भाशा अभिमानी संघटणाच न्हय, तर खुद्द सरकार ह्या वक्तव्या आड गेलां. मुख्यमंत्री सिद्धरामय्या म्हणटात, ‘बाबड्या’ कमलाक कन्नडाचो इतिहास खबर ना. ताचेर कमल म्हणटा, ‘हांव जें उलयलों तें मोगान उलयलों. म्हाका जायत्या इतिहासकारांनी भाशेचो इतिहास शिकयला. राजकारणी भाशे विशीं उलोवपाक पात्र नात. म्हजे कडेनूय ती पात्रताय ना. ह्या गंभीर मुद्द्या वयली चर्चा इतिहासकार, पुरातत्वशास्त्रज्ञ आनी भाशाशास्त्रींक जाय जाल्यार करूंदी.’
आतां कमलाच्या विधानान राजकी रूप घेतलां. दुसऱ्यांचे भाशेचो अपमान करप हें असभ्य वागप, अशें भाजपा म्हणटा. काँग्रेसीनूय निशेध केला. वास्तवीक कन्नड आनी तामिळाक अभिजात भाशा म्हूण मान्यताय मेळ्ळ्या. दोनूय भाशा वेगळ्यो. द्रवीड कुटुंबांतल्यो. तांचो मूळ स्रोतूय प्रोटो – द्रविडीयन. हातूंत तेलगू, मल्याळम आनी तुळूय येता. कन्नडाचे पयले लेखी पुरावे ख्रिस्तपूर्व 230 तर तामिळाचे लेखी पुरावे ख्रिस्तपूर्व 500 वर्सां पयलीं मेळ्ळ्यात. दोनूय भाशांनी कांय समान उतरां आसात. तांचें व्याकरण, उच्चार, साहित्यीक परंपराय वेगळी. ह्या वादांत खरें म्हणल्यार भाशाशास्त्रींनी आपली भुमिका मांडपाक जाय आशिल्ली.
सध्या दक्षीणेंतल्या राज्यांनी त्रिभाशा सुत्रा वयल्यान वाद चालू आसा. नव्या शिक्षण धोरणा प्रमाण हिंदी शिकची पडटली. ती तांकां नाका. तमिळनाडूंत हो विरोध चड खर आसा. आमी भाशे खातीर जीव दिला, तुमी आनीक गोंदळ करूं नाकात. आमच्या भुरग्यांक कितें जाय, नाका तें खबर आसा, अशें कमलान हालींच म्हणिल्लें. दुसऱ्या भाशा झुजाक आमी तयार आसात. हिंदी स्विकारपी राज्यां तांची मायभाशा वगडायतात, अशी प्रतिक्रिया मुख्यमंत्री स्टेलीन हांणी हालींच दिल्ली. तातूंत आतां हो कन्नड, तामिळ वाद. कोण आवय आनी कोण धूव काय दोगीय वेगळ्यो, हें जाणकारांक थारावंदी. समाजाक शांतिकायेची गरज आसा, पूण कांयजाण भाशेक बोली म्हूण हिणसावन वा तिच्या जल्मा वयल्यान वाद घालपाक लागल्यात, हें समा न्हय. हातूंत फावता तें इंग्लीशीचें.