धुरंधर : पाक- आयएसआयचें खरें रूप दाखोवपी गुप्तहेरपट

भांगरभूंय | प्रतिनिधी

दिग्दर्शक आदित्य धर हांणी पुराय सिनेमा आपल्या खांद्याचेर पेलून व्हेला. हो सिनेमा खंयच्याय अभिनेत्याचो ना, तो फक्त दिग्दर्शक धर हांचो आसा. तांकां वालोर दिवपाक जाय.

धुरंधर हो सिनेमा सोपुंक आयिल्ल्या वर्साच्या डिसेंबर म्हयन्यांत प्रदर्शित जालो आनी नवे पिळगेंतल्या सिनेमामोगींनी तो तकलेर घेतलोच, पुण नायक रणवीर सिंह हाच्या नावाचो ‘उजो’ करचे परस सिनेमांत खलनायक आशिल्लो अक्षय खन्नाच्या नावाचो ‘धुंगोर’ युट्यूबा सयत सगल्या सोशल मीडिया आनी रिल्स हांचेर सुरू आसा. जायते सिनेमा फ्लॉप दिल्ल्या रणवीर सिंह हाका ‘धुरंधर’ ह्या सिनेमा निमतान थाकाय मेळ्या. पूण तांचो अभिनय आनी एकंदर ‘परफॉर्मन्स’ हाची जाय तशी तोखणाय जावंक ना. ताची अभिनय आनी एकूण पात्रा वयली पकड बेसबरी आसली तरी तो, बॉलिवूड उद्देगातले 1990 आनी 2000 च्या दसकांतले तीन रोमँटिक आनी ॲक्शन हिरो संजय दत्त, अक्षय खन्ना आनी अर्जुन रामपाल हांचे अभिनय क्षमतेच्या पालवा सकयल अशे तरेन लिपिल्लो आसा, जशें एखादे वाडटें रोंप तीन- तीन म्हारुखांचे सांवळे खालां लिपता.  

सिनेमा हो एक गुप्तहेरपट वा “स्पाय थ्रिलर” ह्या प्रकारांतलो वा गटांतलो (genre) चित्रपट आसा, जो पाकिस्तान हे राष्ट्र भारताचेर हल्लो करपाक आतंकवादी कशे पोसता आनी आयएसआय ही संघटना ताका कसो तेंको दिता हाचे यथार्थ चित्रण करता. पाकिस्तानांतल्यान भारताचे अर्थव्यवस्थेत नकली नोटी घुसोवन तशेंच घुसखोरी करपाक दहशतवादी आनी ब्रेनवॉश करून ‘जिहादी मानसिकता’ कशी तयार करता आनी ह्या तरणाट्यांक भारताचेर हल्ले करपाक एसएलआर, एके 47 सारक्या बंदुकांची पुरवण कशी करता हाचेर हे फिल्म उजवाड घालता. रणवीर सिंहान ज्या गुप्तहेराची भूमिका केल्या, अशे कितलेशेच पाकिस्तानांत आतंकवाद्यां मदीं रावून आतंकवादी कारवायांची म्हायती आपले भारतातले मातृसंस्थेक (Mother Organization), जशें की रिसर्च ॲन्ड ॲनालिसिस विंग (Research and Analysis Wing – RAW) हांकां दितात आनी आतंकवाद्यांचे भारतांतल्या राज्यांनी नियोजित केल्ले बॉम्बस्फोट, जातीय दंगली अशे राष्ट्रविरोधी मनसुबे उधळून लायतात. 1971 च्या भारत- पाकिस्तान झुजा उपरांत भारताक फुडल्यान टक्कर दिवन हारोवप अशक्य आसा हें कळ्ळे उपरांत भारताचे कुडके करपाची एकूच महत्त्वाकांक्षा दवरून पाकिस्तानाचें लष्कर आनी सरकारां वावुरलीं. भारतात जाल्ले बॉम्बस्फोट, आतंकवादी हल्ले, संसदेचेर जाल्लो हल्लो आनी मुंबय 2008 सालांत जाल्लो 26/11 चो हल्लो हातूत पाकिस्तानाचो हात आशिल्लो, हें उघड सत्य आसूनय तेन्नाच्या सरकारांनी कांयच ठोस कारवाय केलीना. आमचें राष्ट्र शांततायेचें, पतंग उडोवपी, इश्टागत करपी आनी हल्ले जाल्यार फकत तोंडान इशारे दिवपी आनी पारवे, कबुतरां सोडपी दुबळें राष्ट्र अशी प्रतिमा 1947 सावन तयार जाल्ली. मात 2014 त भाजपाच्या फुडारपणा खाला एनडीए सत्तेर येतकच हे प्रतिमेक छेद बसलो. पाकिस्ताना कडल्यान हल्लो जायत जाल्यार “सर्जिकल स्ट्राईक” करून दुस्मानाक ताच्या घरांत घुसून मारपाची आमची शक्त तशेंच धमक आसा, हे पळोवंक मेळ्ळें. 

दिग्दर्शक आदित्य धर हांणी पुराय सिनेमा आपल्या खांद्याचेर पेलून व्हेला. हो सिनेमा खंयच्याय अभिनेत्याचो ना, तो फक्त दिग्दर्शक धर हांचो आसा. तांकां वालोर दिवपाक जाय. संजय दत्त, अक्षय खन्ना, आर. माधवन, अर्जुन रामपाल, राकेश बेदी सारकिल्ले बॉलिवूडांत वर्सां काडिल्ले कसलेले अभिनेते हे सिनेमाचे खांबे आनी यूएसपी (Unique selling proposition) आसात. दत्त, माधवन आनी रामपाल हांणी आपलीं पात्रां उबी करतना अभिनेते म्हूण परिपक्वताय दाखयल्या. सिनेमा आनी टिव्ही माळो गाजयिल्ले राकेश बेदी खूब वर्सांनी सिनेमांत परतून दिसपाक लागल्यात, बरे दिसता. अक्षय खन्ना हांणी उबो केल्लो ‘अब्दुल रेहमान बलोच उर्फ खान भाई उर्फ रहमान डकैत’ हो खलनायक आयच्या काळांतलें एक आयकॉनिक खलनायकाचे पात्र आसा. ‘छावा’तलो औरंगजेब लेगीत ताणें बेसबरो केल्लो. एक अभिनेता म्हूण आयज जो लोकांचो मोग आनी प्रसिद्धी मेळटा ते पळोवपाक आयज तांचे ‘पापा’ आनी अमिताभ बच्चनाक टक्कर दिवपी एकमेव सुपरस्टार विनोद खन्ना जीवित आसपाक जाय आशिल्ले, अशे दिसता (हे वाक्य बरयतना म्हज्या काळजांत कच्च जालें). अक्षय खन्ना हांचो रेहमान डकेत, रामपाल हांचो मेजर इक्बाल हो आयएसआय मुखेली भंय आनी दहशत निर्माण करता. संजय दत्ताचे “एसपी चौधरी अस्लम” हें पात्रूय एक तगडो किरदार आसा, तशेच तांचो सिनेमातलो प्रवेश, 1980 चे दसकातले “हवा हवा ऐ हवा, खुशबू लुटा दे” हे पाकिस्तानी गायक हसन जहांगीर हांच्या फामाद गीताचेर दाखयल्या, जो ताळयो वसूल करता. ह्या बोवाळांत, रणवीर सिंहा कडेन दुर्लक्ष जाला, अशे म्हाका एक निष्पक्ष सिनेसमीक्षक म्हूण दिसता.  सिनेमांतलो हिरो जसकिरत सिंग रंगी उर्फ हमजा अली मजारी ताणें परिपक्वतायेन, मेहनतीन उबो केला. ताची तोखणाय जावची आनी फावो तें श्रेय मेळचें. गोंयांत ‘इफ्फी 2025’ च्या समारोपांत ताणें अतिउत्साही जावन कन्नड सुपरस्टार रिषभ शेट्टी आनी मुख्यमंत्री भोवमानेस्त दोतोर प्रमोद सावंत हांच्या फुडल्यान जी ‘विदुषकपणा’ केल्ली, तशी अतिताय करून स्वतःची प्रतिमा ‘डॅमेज’ करची न्हय. लोकांचे देवी देवतांची फकांडां, टिंगल टवाळी करून वाद निर्माण करून ‘चूड दाखोवन म्हारू घरात हाडप’ असो प्रकार करचो न्हय. अतीउत्साहीपणा, आबुजपणा हांचेर नियंत्रण दवरचें. ते एक बरे अभिनेते आसात, जांची ऊर्बा, उमेद आनी उत्साह व्यर्थ वच्चो न्हय. सारा अर्जुन, मानव गोहिल, गौरव गेरा, दानिश पंडेर, सौम्या टंडन हांच्यो सहायक भूमिका बऱ्यो जाल्यात.

हाव फिल्म पळोवंक गेल्लो त्या फोंडे शाराचे सिनेमाघरांत काय अतिउत्साही जोडप्यांनी आपल्या 8- 9 वर्सांच्या सान पिरायेच्या भुरग्यांक हो सिनेमा दाखोवंक हाडिल्ले. तांणी पालकत्वाचो असो कितें पराक्रम केलो हें म्हाका अजून मेरेन कळुंक ना. हो सिनेमा प्रौढ प्रेक्षकांक लागून आसा. सिनेमात आतंकवादी आनी पाकिस्तानी पुलिशे भितर तशेंच टोळयां मदलीं रक्तरंजित झुजां, हात, पाय कापून तशेच शरीराचे कुडके जावन येवपी मरण, भारतीय गुप्तहेर पाकिस्तानी आतंकवाद्यांच्या हातांत सांपडले तर कशे क्रूर आनी अमानुष पद्धतीत छळ करून तांकां मारतात तशेच पाकिस्तानांत सान पिरायेच्या चले आनी तरणाटे दादले हांचेर जावपी बलात्कार (पाकिस्तानांत हो अमानुश प्रकार ‘बच्चाबाजी’ म्हूण फामाद आसा.) अशे धक्कादायक संदर्भ दिवपी काय दृश्यां आसात, तांचो ल्हान भुरग्यांचेर वायट परिणाम जावं येता. 18 वर्सा सकयल्या भुरग्यांक हो सिनेमा दाखोवंक व्हरचें न्हय.

एकंदर हो सिनेमा देशभक्ती निर्माण करतना पाकिस्तानाचें खरें स्वरूप दाखयता. 2026 सालांत येवपी सिनेमाचो दुसरो आनी निमाणो भाग रंजक आनी चड रोमांचक जावपाचो आसा. म्हाका चड देशभक्ती पाताळावपाची इत्सा एक सिने अभ्यासक म्हूण हांगा दाबून दवरची पडटा. पूण सिनेमात म्हणलां तशें, ‘ये नये जमाने का भारत है, घरमें घुसकरही मारेगा.’ हें वाक्य सध्याच्या केंद्र सरकारांत आशिल्ल्या नेतृत्वाक चपखल लागू जाता. आता 2026 तल्या मार्चाची वाट पळोवया. जय हिंद.

– सनतकुमार फडते