भांगरभूंय | प्रतिनिधी
दिवचल: साळ- मेणकुरेंच्या धुमासे गांवांत मुखेल रस्त्यार बिरेस्तारा फांतोडेर ४ वरांचेर आंब्याचें झाड मुळा सकट हुमटून पडलें. हाका लागून हो रस्तो ६ वरां येरादारी खातीर बंद आशिल्लो. गांवांतल्यान वचपी हो एकूच आनी मुखेल रस्तो आशिल्ल्यान विद्यार्थी, कामाक आनी बाजारान वचपी आपले सुवातेर वेळार पावूंक नात.
हें झाड वार्याक लागून कोसळ्ळें. झाडाक लागून लायटीच्यो सरयो तुटल्यो. मात लायटीचो प्रवाह बंद उडोवंक नाशिल्लो. उपरांत उजो पालोवपी दळाचे जवान घडणुके सुवातेर पावले तेन्ना तांच्या हें लक्षांत आयलें. णव वरांचेर वीज खात्याच्या कर्मचार्यांनी येवन लायट उडयली. उपरांत उजो पालोवपी दळान हें रस्त्यार पडिल्लें आंब्याचें झाड कुशीक केलें.
सहा वरां येरादारी खातीर बंद पडिल्लो हो मार्ग सकाळीं धा वरांचेर येरादारीक मेकळो केलो. ह्या आंब्याक लागून आनंद नायक हांकां सुमार धा हजार रुपयांचें लुकसाण जालें. तांचे स कवाथे मोडले. तशेंच आंगणांतले गॅरेजीचें लुकसाण जालें. तशेंच बागेचेंय लुकसाण जालें.
झाड कापून रस्तो मेकळो करपा खातीर दिवचल उजो पालोवपी दळांतले लीडिंग फायर फायटर – विठ्ठल गाड, फायरमॅन – बाबुली मांद्रेंकार, युवराज गांवकार, अनुप नायक, निलेश हळर्णकार तशेंच ड्रायव्हर रामदास परब हांणी काम केलें. तशेंच रस्तो मेकळो करपाक तांकां थळाव्यांनीय मजत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
