भांगरभूंय | प्रतिनिधी
मडगांव: धिरयो प्रकरणांत कोलवा पुलिसांनी आतां मेरेन तिगांक अटक केल्या. कॉल रेकॉर्डची पळोवणी केले उपरांत आनीक कांय जाणांचेर पुलिसांचो दुबाव आसा. बैल आनी रेडे आशिल्ल्यां सयत कॉल रेकॉर्डसांतल्या म्हायतीच्या आदारार दुबावितांक नोटीसो धाडल्यात. दुबावीत मिनिनो फर्नांडीस, रुई मिनेझीस आनी राकेश हांचो पुलीस सोद घेतात.
फाटल्या धिरयांच्या वेळार रेड्याच्या हल्ल्यांत राजेश निस्तानी (42, रा. गिर्दोली) हाका मरण आयिल्लें. ह्या प्रकरणांत कोलवा पुलिसांनी स दुबावितांचेर गुन्यांव दाखल केल्लो. आतां मेरेन दुबावीत सांतान कार्दोझो (43, रा. कुडतरी), ज्योकिम परेरा (48, रा. माजोर्डा) आनी जुझे कुलासो ऊर्फ पेले (54, रा. माजोर्डा) हांकां अटक केल्या. ह्या तिगांय दुबावितांनी जामिना खातीर न्यायालयांत अर्ज केला.
माजोड्डाच्या पॉवरस्टेशना लागसार 22 तारखेक ’चांदो’ आनी ’गॉडफादर’ह्या रेड्यांमदीं धियांचें आयोजन केल्लें. तेन्ना ’चांदो’ ह्या रेड्यान राजेश निस्तानी हाचेर हल्लो केलो. हातूंत तो जखमी जालो आनी उपरांत ताका मरण आयलें. कोलवा पुलीस निरीक्षक विक्रम नायक हांच्या मार्गदर्शनाखाला ह्या प्रकरणाचो तपास सुरू आसा. दुबावीत रुई मिनेझिस, राकेश आनी मिनिनो फर्नांडीस फरारी आसात. तांणी अटकपूर्व जामिना खातीर न्यायालयांत धांव घेतल्या. कोलवा पुलिसांनी तपासा मजगतीं दुबावितांचे कॉल रेकॉर्डस तपासल्या. ते म्हायतीच्या आदारार आनीक कांय दुबावितांक ह्या प्रकरणांत नोटीचो जारी केल्यात. तशेंच, कोलवा वाठारांत जांचे कडेन बैल आनी रेडे आसात, तांकांय नोटीसो धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
