भांगरभूंय | प्रतिनिधी
मडगांव : धिरयोंवर नियंत्रण हाडपा खातीर दक्षीण गोंय जिल्लोधिकार्यांनी बेगोबेग प्रतिसाद दिवपाक समितीची स्थापना केल्या. मात धिरयांचें आयोजन आजूनय चालूच आशिल्ल्याचें पळोवपाक मेळटा. कोलवा उक्त्या मैदानाचेर शेनवारा धिरयांचें आयोजन केल्ल्या प्रकरणांत कोलवा पुलिसांनी अनवळख्यां आड गुन्यांव नोंद केला.
राज्यांतलीं जनावरांचीं झुजां बंद करपाक राज्य सरकाराचे विवीध यत्न चालूच आसात. दक्षीण गोंय जिल्लोधिकार्यांनी ह्यान पयलीं दरेका म्हाला प्रमाण टास्क फोर्स समित्यांची स्थापना केली आनी धिरयांचें आयोजन जावचें न्हय म्हूण गरजेचीं पावलां उबारपाक लायिल्लीं. तशेंच कृती दळाक हालींच प्रशिक्षणूय दिल्लें. ही परिस्थिती कशी सांबाळची हाचेर चर्चा जाल्ली. तशेंच सरकारान बैलांक आनी रेड्यांक मायक्रोचीप बसोवपाचे निर्देश दिल्ले. ना जाल्यार ५० हजारांच्या दंडाचे कारवायेची शिटकावणीय दिल्ली. सरकाराच्या इतले कारवाये उपरांतूय सासश्टी वाठारांत आजूनय धिरयो चालूच आसात.
कोलवा पुलीस स्टेशनाच्या वाठारांत उक्ते सुवातेर बैलांचे झुंजीचें आयोजन केल्लें. ह्या प्रकरणांत आतां कोलवा पुलिसांनी दोन अनवळख्या आड धिरयो आयोजन केल्ल्या प्रकरणांत प्राणी क्रुरताय प्रतिबंधक कायद्या खाला गुन्यांव नोंद केला. ह्या प्रकरणांत पुलीस उपनिरीक्षक मंजू वांतामुरी फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
