भांगरभूंय | प्रतिनिधी
साश्टींत बेकायदो कोंब्यांच्यो झुजी सुरू
भांगरभूंय । प्रतिनिधी
मडगांव : धिरयांचेर कारवाय केल्ल्यान ताचेर आळाबंद आयला. आतां साश्ट वाठारांत कोंब्यांचो झुजी सुरू जाल्यात. बिगर गोंयकारां सयत कांय थळाव्यांचो तातूंत आस्पाव आशिल्ल्याचें दिसून येता. ह्या झुजींचेर कारवाय करपाची मागणी थळाव्या लोकांनी केल्या.
कोलवा गांवांत सुरू आशिल्ल्या बेकायदो कोंब्यांच्या झुजी खातीर लोकांनी तिडक उक्तायल्या. हातूंत कांय स्थलांतरांचो आनी कांय थळाव्या लोकांचो आस्पाव आशिल्ल्याचो आरोप आसा. हे संबंदांत सेगीत कागाळी केल्यात, तशेंच अधिकाऱ्यांक पुरावे लेगीत दिल्यात. तरी लेगीत अजून मेरेन कसलीच कारवाय करूंक ना, अशें थळाव्या लोकांचें म्हणणें आसा.
आयतारा कोलवाच्या कलर्स फ्लाय हॉटेला फाटल्यान ह्यो कोंब्यांच्यो झुजी जाल्यो. थंय नेमान झुजी आयोजीत करतात. चड करून आयतारा थंय खूब गर्दी जाता.ह्या झुजींनी उक्तेपणी जुगार आनी सट्टेबाजी करतात. तातूंत कायदो आनी सुवेवस्ता, जनावरां वयली क्रूरताय आनी वाठारांतले भौशीक सुरक्षे संबंदांत गंभीर हुस्को निर्माण जाता.
थळावो सिमाओ रॉड्रिग्स हांणी सांगलें, हो मुद्दो नेमान मांडटात, पूण अजून कारवाय जायना. बेकायदो कोंब्यांच्यो झुडी, जातूंत व्हड संख्येन स्थलांतरीत वांटो घेतात. चडश्या दर आयतारा कलर्स फ्लाय हॉटेला फाटल्यान ह्यो झुजी पळोवपाक मेळटात. हो मुद्दो संबंदीत अधिकाऱ्यांचे नदरेक हाडून दिला, पूण कसलीच कारवाय जावंक ना. ह्या बेकायदो कारवायां विशां उलयल्ले कातीर आपल्याक धमकी दिल्ली, अशेंय तांणी सांगलें. कोंब्यांच्यो ह्यो झुजी जुगाराची सुवात जाल्या. लोक थंय कोंब्यांच्यो झुजी पळोवपाक येतात आनी कोंब्यांचेर पैजो लायतात. पुलीस आनी जिल्हो अधिकाऱ्यांनी आयोजकांचेर आनी वांटो घेवप्यांचेर तत्काळ कारवाय करची, अशी थळाव्या लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
