भांगरभूंय | प्रतिनिधी
दिवचल : सांखळे सावन मोपा वतना आधार हॉस्पिटला लागसार तीग जाणांनी गाडी आडवी घालून धमकी दिवन 10 लाख रुपयांची खंडणी मागपाची घडणूक घडली. कागाळदारान सोमतीच पुलिशेक खबर दिल्ल्यान दुबावीत थंयच्यान पळून गेले. ह्या प्रकरणांत पुलिसांनी सलमान खान (पोरणें गोंय), मकसूद खान (फोंडें) हांकां शेनवारा रातीं ताब्यांत घेतल्यात. दिवचल पुलीस अदीक तपास करतात.
दिवचल पुलिशेंत ह्या प्रकरणांत केरी सत्तरीच्या मुआ ज शेख हाणें कागाळ नोंद केल्या.
पुलीस सुत्रांनी दिल्ले म्हायती प्रमाण कागाळदार आनी ताच्या चुलत्याक तांचे टोयोटा इनोव्हा मोटारींतल्यान सांखळे सावन मोपा वटेन प्रवास करतना दुबावितांनी चुकीचे पद्दतीन आडावन पयशे काडपाचो गुन्यांवकारी कट रचलो. दुबावितांनी सुझुकी स्विफ्ट (जीए 09 ए 0633), सुझुकी वॅगन आर आनी काळ्या रंगाच्या हिरो होंडा स्प्लेंडर रस्त्याचेर आडव्यो उब्यो करून रस्तो आडायलो.
दरेके गाडयेंतलो एकेकलो दुबावीत आयलो आनी कागाळदाराच्या चुलत्या कडेन गेलो आनी ताका मारपाची धमकी दिली. ते उपरांत भंय दाखोवन 10 लाखांची खंडणी मागली. पूण कागाळदारान 112 नंबराचेर फोन करून पुलीस नियंत्रण विभागा कडेन संपर्क करपाचो यत्न केलो. तेन्ना दुबावितांनी थंयच्यान पळ काडलो. दिवचल पुलीस स्टेशनांत कलम 61 (2), 126 (2), 308 (5) कलम 62 बीएनएस 2023 खाला गुन्यांव नोंद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
