भांगरभूंय | प्रतिनिधी
पणजी : फाटल्या धा दिसांनी वास्को रेल्वे मार्गार तिगां अनवळख्या दादल्यांच्यो कुडी सांपडल्यो. हातुंतलीं दोन प्रकरणां मंगळार, २२ जुलयाक मुखार आयलीं. वास्को रेल्वे पुलीस स्टेशनान अपघाती मरणाची नोंद घेतल्या. मरण आयिल्ल्यांची वळख पटपा खातीर जनतेक मजतीचो उलो मारला.
जाणून घेवया ह्या घडणुकां विशींची म्हायती:
पयली घडणूक: ही मडगांव आनी चांदोर मजगतीं घडली. एका अनवळखी मनशाची कूड रेल्वे रुळाचेर दिसली. मुळावे तपासणे उपरांत ताणें आत्महत्त्या केल्ल्याचो दुबाव उक्तायला. मरण आयिल्ल्या मनशाची पिराय सुमार ४० ते ४५ वर्सां आसा. ताचो रंग गंवा सारको, घटमूट भुजां, उंचाय सुमार ५ फूट ५ इंच, आंगार आर्मी-ग्रीन रंगाची ट्रॅक पँट. कूड दक्षीण गोवा जिल्हा हाॅस्पिटलांत दवरल्या.
दुसरी घडणूक: सांकवाळे आनी वास्को रेल्वे स्टेशना मजगतीं घडली. हातूंत ४५ ते ५० वर्सां पिरायेच्या एका अनवळखी मनशाची कूड सांपडली. मरण आयिल्ल्याची उंचाय सुमार ५ फूट ६ इंच, ताचो रंग गोरो आनी शरीर बारीकूच आसा. निळो फुलांचो शर्ट आनी काळी फॉर्मल पँट घाल्या. मुळाव्या तपासांत हो मनीस रेल्वे रुळ हुपतना अपघातान मरण पाविल्ल्याची शक्यताय आसा.
मुरगांवचे पुलीस दोनूय प्रकरणांचो तपास करतात.
तिसरी घडणूक: १४ जुलयाक सकाळीं सांकवाळ-कासावले मजगतीं अरुण होरो (२३, मूळ झारखंड) ह्या तरणाट्याक रेल्वे पोंदा आयिल्ल्यान मरण आयलें. तो कानांत इअरफोन लावन मोबायलाचेर उलयत रेल्वे रूळ हुंपतालो. ह्या वेळार हॉर्न आयकूंक येवंक नाशिल्ल्यान तो धांवते रेल्वे पोंदा आयलो. वास्को रेल्वे पुलिसांनी हे विशीं अपघाती मरण आयिल्ल्याची नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
