भांगरभूंय | प्रतिनिधी
पणजी : राज्यांत मान्सुनाची सुरवात चड करून ५ जुनाक जाता. अंदूं मान्सून ११ दीस पयलींच म्हळ्यार २५ मेक दाखल जालो. मान्सून तशेंच मान्सून पूर्व काळांत जाल्ल्या उटंगाराच्या पावसाची नोंद केल्या. २० ते २९ मे ह्या धा दिसांच्या काळांत राज्यात सरासरी २५.०९ इंच पावसाची नोंद जाल्या. पोरूं २४ जुनाक पावसान २५ इंचाची सरासरी पुराय केल्ली. अंदूं ताच्या एका म्हयन्या पयलींच २५ इंचाची सरासरी पुराय जाल्या.
राज्यांत फाटले दोन दीस पावसाची खराय वाडल्या. बुधवारा रातीं तशेंच बिरेस्तारा घोग्यांनी पावसाची नोंद जाली. चोवीस वरांनी राज्यांत सरासरी २.७५ इंच पावसाची नोंद जाली. मजगतीं केप्यां ६.६९ इंच, सांग्यांर ५.३१ इंच, काणकोणा ४.६१ इंच, मडगांवां ४.१० इंच जाल्यार पणजे ३.७३ इंच पावसाची नोंद जाली. हवामान खात्यान ३० मेक राज्यात मध्यम स्वरूपाच्या पावसाची शक्यताय उक्तावन येलो अलर्ट जारी केला.
राज्यांत ३१ मे तशेंच ३ आनी ४ जुनाक मध्यम स्वरूपाच्या पावसाची शक्यताय आसा. ह्या तीन दिसां खातीर कसलोच अलर्ट दिवंक़ ना. जाल्यार १ आनी २ जुनाक पावसाचो येलो अलर्ट जारी केला. बिरेस्तारा पणजे चडांत चड २७.८ अंश जाल्यार उण्यांत उणो २४.६ अंश सेल्सिअस तापमानाची नोंद जाली. मुरगांवचो चडांत चड तापमान २७.८ अंश आनी उण्यांत उणो तापमान २४.४ अंश सेल्सिअस उरतलो. फुडले स दीस राज्यांतलो चडांत चड तापमान २८ ते २९ अंश सेल्सिअस उरपाची शक्यताय आसा.
१ मार्च ते २९ मे मेरेनचो पावस (इंचांनी)
केंद्र / पावस
मडगांव / ३१.०९
म्हापशें / २७.५१
धारबांदोड्यां/ २७.०३
मुरगांवां / २६.९०
दाबोळे/ २६.२७
सांग्यार / २५.७५
फोंडें / २५.२७
पेडणें / २४.२५
पणजी / २४.०७
केपें / २२.९६
सांखळे / २०.३७
पोरणें गोंय / २२.८५
काणकोण / २२.६२
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
