भांगरभूंय | प्रतिनिधी
धावेचे परिक्षेचो निकाल जालो. 96.64 टक्के. हालींची पिळगी हुशार, तातूंत अभ्यासक्रम सोंपो जाला आनी सगल्यो सादन- सुविधा हाता लागीं आसात, देखून इतलो बरो निकाल लागता, अशें कांय जाणांक दिसता. तांचो युक्तिवाद सामकोच न्हयकारूं नजं. महाराष्ट्रांत, दिल्लींतय अशेच निकाल येतात. 3- 4 वर्सां पयलीं तर उत्तर भारतांत एके चलयेक सगल्या विशयांनी 100 टक्के गुण मेळिल्ले. गोंयांतूय फुडाराक हें जातलें. 187 शाळांचो निकाल 100 टक्के लागला. 19,958 विद्यार्थी बशिल्ले. तातूंतले 19,288 पास जाले. 35 वर्सां पयलीं 75 टक्के मेळप म्हणजे व्हडलो पराक्रम मानताले, मात आयज दिसता तो भुरगो 80 टक्क्यां वयर. सगल्या हुशार भुरग्यांक परबीं. नापास जाल्यात तांणी जूनांतले परिक्षेंत पास जावचें.
जितले चड विद्यार्थी उंचेल्या गुणांनी पास जातात, तितलो तांकां प्रवेश मेळपाक कठीण जाता. पयलीं 80 टक्के मेळ्ळ्यार वैजकी फाट्याक प्रवेश मेळटालो. मात आतां ते खातीर 90 टक्क्यां वयरूच गुण मेळपाक जाय. हेर फांट्यांनीय कटआॅफ रेट खूबच वयर चडल्या. 60 टक्के गुण घेवप्यांक नावाजते शिक्षण संस्थेंत प्रवेश मेळत म्हूण खात्री ना. बारावे यत्ते उपरांत, शिक्षणा खातीर राज्य, देशा भायर वचपी विद्यार्थ्यांचोय आंकडो खूब वाडला. ते खातीर सरकारान गोंयांतल्या महाविद्यालयांतले, तांत्रिक, वैजकी आनी हेर अभ्यासक्रम शिकोवपी संस्थांतले जागे वाडोवपाक जाय. ह्या संस्थांचो आंकडोय वाडचो. तरातरांचो अभ्यासक्रम शिकोवपी संस्था, म्हाविद्यालयां हांगां येवपाचीं आशिल्लीं. तीं आयल्यांत? आयआयटीचोय पत्तो ना. आतां लाखांनी चौ. मिटर जागो गोंयांत मेळप कठीण. चडशे जागे पावणेर गेल्यात. पणजेच्या जुंता हावसा सारक्यो दोन इमारती आनी मैदान उबारून आयआयटी सुरू करप शक्य ना? धावेची परिक्षा पास जावप सोंपें, पूण मुखार इकरावेक वा बारावी करून जाय ते शाखेंत वशिल्या बगर प्रवेश मेळप कठीण, अशी सध्याची परिस्थिती.
दुसरी गजाल, ब्रेन ड्रेनाची. पोटा फाटल्यान स्थलांतर करपी विद्यार्थ्यांची. राष्ट्रप्रेम, संस्कृती, धर्म हांचे खातीर जीव तळहाताचेर घेवन सोशल मिडियाचेर किंवाट्यान झुजपी जायत्या भारतीयांचीं भुरगीं युरोप, अमेरिका, आॅस्ट्रेलियेक स्थलांतर करपाक लागल्यांत. पालकूच तांकां धाडपाक लागल्यात. कांय कायमचीं थंय रावतात. गोंयांतले 90, 95 टक्के घेवपी 50 विद्यार्थी दरवर्सा कायमचे वा 25 वर्सां खातीर विदेशांत गेले, जाल्यार ताचे हुशारेचो गोंयांक फायदो जावचो ना. आमी भारतीय सदां उठून हेर देशांक वयर काडपाक घाम गळोवपाक लागले जाल्यार तें कशें दिसतलें? चडशे थंय वतात, चड पगार मेळटा म्हूण. तेन्ना गोंय सरकारान ते हांगाच रावतले, हे खातीर यत्न करूंक फावो. पगार वाडयत, सरभोंवतणी बरें वातावरण मेळत जाल्यार हें विदेशवारीचें चित्र बदलपाक शकता. रात दीस शिंपून, मेहनत घेवन झाडां आमी वयर काडपाचीं आनी फळां खावपाचीं विदेशी लोकांनी? आनीक कितलीं वर्सां चलतलें हें? उत्तर भारतांतले लोक गोंयांत कामा निमतान येतात, तेन्ना तांचीं राज्यां विकसीत जावंक ना, अशें आमी म्हणटात, तांचो अपमानूय करतात. मागीर गोंयां सयत देशाच्या हेर राज्यांतले हुशार
तरणाटे विदेशांत वतात, तेन्ना कितें म्हणपाचें?
गोंयांतल्या रोजगाराचेर विचार जावंक जाय. गोंयकार भुरग्यांक नेमके कसले वेवसाय, नोकऱ्यो, धंदे आवडटात, तांचो कल खंयचे गजाली कडेन आसा, ताचो अभ्यास करून ते प्रमाण हांगा शिक्षण संस्था, कंपनीं, कारखाने हाडपाक जाय. तांकां परवानो दितना हाचो विचार करू येता. कुशळटाय विकास सगल्यांत गरजेचो. सगलेच सरकारी नोकरे फाटल्यान धांवपाक लागिल्ल्यान पारंपरिक उद्देगाचीं मळां रिकामी पडल्यांत. तो जागो भायल्यांनी भरला. दुसरे कडेन जमनी, भाटां विकून त्या पयशांचेर खावन, पिवन मजा करपी गोंयकारांचो आंकडो वाडत आसा. इझी मनीच्या फाटल्यान कांय जाण लागल्यात. ते कितें करतात, तें मुद्दाम सांगपाची गरज ना. स्टार्ट अप वा सरबराय, मनोरंजना सारक्या हेर वेवसाया वरवीं स्वताच्या पांयांचेर उबे राविल्ल्या तरणाट्यांचो आदर्श हेरांक मेळपाक जाय. गांव सोडले बगर कोणाचीच उदरगत जायना, ही गजाल खरी, पूण गोंय आनी हेर भारतीय विद्यार्थी आपापल्या राज्यांनीच पोटाक लागचे, विदेशांत वचपाचो तांचेर वेळ येवचो न्हय, हेंय तितलेंच बरें. तुमकां कितें दिसता?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
