भांगरभूंय | प्रतिनिधी
आठ दिसां भितर दोन वासरां मारलीं; लोकां मदीं भंय
भांगरभूंय । प्रतिनिधी
वाळपयः सत्तरी म्हालांतल्या धावे उस्ते वाठारांत पट्याच्या वागाचो वावर वाडला. फाटल्या आठ दिसां भितर दोन वासरां मारिल्ल्यान ह्या वाठारांतल्या लोकां मदीं भिरांत पातळ्ळ्या. ह्या वागाची रान खात्याचे यंत्रणेन ताकतिकेन दखल घेवची, अशी मागणी ह्या वाठारांतल्या लोकांनी केल्या.
थळाव्या लोकांनी दिल्ले म्हायती प्रमाण फाटल्या 15 दिसां सावन नेमान एक पट्याचो वाग ह्या वाठारांत दिसता. आठ दिसां भितर ताणें दोन वासरांक मारल्यांत. रान खात्यान एक तर ताका धरचो वा थंयच्यान धांवडावन घालचो, अशी थळाव्या लोकांनी मागणी केल्या.
सध्या काजूचो मोसम सुरू जाला. ह्या वाठारांतलीं खूबशीं कुटुंबां काजू उत्पादनाचेर आपलो घरसंवसार चलयतात. ह्या वाठारांतल्या लोकांक फुडले तीन म्हयने नेमान काजू बागायतींत वचचें पडटलें. वागाच्या भंयान ते काजू बागायतींत गेले ना जाल्यार खूबशीं कुटुंबां उपाशी पडूं येतात, अशें काजू उत्पादकांचें म्हणणें आसा. मजगतीं, तीन वर्सां आदीं रिवें वाठारांत पट्याच्या वागाची भिरांक पातळिल्ली. अखेर तीन वागांक मरण आयिल्ल्याचें प्रकरण उजवाडाक आयिल्लें. तांचेर विखबादा जाल्ल्याचें प्रथमदर्शनी दिशिल्लें, ताका लागून खळबळ निर्माण जाल्ली. हे संबंदांतली दखल घेवन रान खात्यान त्या वाठारांत दिसपी पट्याच्या वागाचो बंदोबस्त करचो, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
