धावेचे परिक्षेचो निकाल सोमारा

भांगरभूंय | प्रतिनिधी

पणजी ः गोंय शालांत मंडळान घेतिल्ले धावेचे परिक्षेचो निकाल सोमारा, 7 एप्रिलाक सांजेच्या 5 वरांचेर जाहीर जातलो. निकाल मंडळाचे अधिकृत संकेतथळार अपलोड करतले. विद्यार्थ्यांनी मंडळाच्या www.gbshse.in आनी http://results.gbshsegoa.net/#/ ह्या संकेतथळांक भेट दिवन निकाल तपासचो.
गोंय शालांत मंडळान राज्यांत 1 मार्च 2025 ते 21 मार्च 2025 मेरेन धावेची परिक्षा घेतिल्ली. ही परिक्षा राज्यभरांतल्या 32 वयर 4 (उर्दू माध्यम) परिक्षा केंद्रांनी जाली. अंदूं 18,838 विद्यार्थी परिक्षेक बशिल्ले. तातुंतले 9280 चलयो आनी 9558 चले आशिल्ले.
फाटल्या वर्सा धावेचे परिक्षेंत वट्ट 18,914 विद्यार्थी बशिल्ले. तातुंतले सुमार 17,473 विद्यार्थी पास जाले. एकूण निकाल 92.38 टक्के लागिल्लो. निकाल पत्रा वांटपाची तारीख बेगीनूच जाहीर जातली.

इतिहासांत पयलेच खेपे पंदरा दिसां भितर निकाल

गोंय मंडळाच्या इतिहासांत पयलेच खेपे परिक्षा सोंपतकच 15 दिसां भितर निकाल जाहीर जाता. मंडळान मूल्यांकन केंद्रां वाडयल्ल्यान आनी मुल्यांकनाच्या वेळार परिक्षक आनी शाळां कडल्यान मेळिल्लो बरो प्रतिसाद आनी सहकार्याक लागून हें शक्य जालें, अशें मंडळान सांगलें.