भांगरभूंय | प्रतिनिधी
अंदूंचो निकाल 3 टक्क्यांनी वाडलोपणजीः अंदूं धावेचो शंबर टक्के निकाल दिवपांत सरकारी शाळांनी अव्वल क्रमांक मेळयला. सरकारी शाळा अनुदानींत शाळां परस सरस थारल्यात. अंदूं राज्यांतल्या वट्ट 407 शाळांतले विद्यार्थी परिक्षेक बशिल्ले. हातूंत 318 अनुदानींत, 11 बिगर अनुदानींत आनी 78 सरकारी शाळांचो आस्पाव आशिल्लो. 78 शाळांतल्यान 43 (55 टक्के) सरकारी शाळांनी शंबर टक्के निकाल मेळयला. तशेंच 39 टक्के अनुदानींत आनी 64 टक्के बिगर अनुदानींत शाळांनी शंबर टक्के निकाल मेळयला. 407 शाळांतल्यान 173 (43 टक्के) शाळांनी शंबर टक्के निकाल मेळयला. गोंय शिक्षण मंडळाचे अध्यक्ष भगिरथ शेटये हांणी सोमारा घेतिल्ले पत्रकार परिशदेंत ही म्हायती दिली.
अंदूं 10वेच्या वर्गाचो निकाल 95.35 टक्के जाला. हे परिक्षेक वट्ट 18,837 विद्यार्थी बशिल्ले. तातूंतले 17,961 जाण पास जाले. तशेंच चलयाे अंदूं 10वेच्या परिक्षेंत अव्वल थारल्यात. चलयांचो निकाल 95.71 टक्के आनी चल्यांचो निकाल 94.98 टक्के आसा. फाटल्या वर्साचे तुळेंत अंदूं विद्यार्थ्यांच्या पास जावपाच्या प्रमाणांत 2.97 टक्क्यांनी वाड जाल्या. शाळा वेवस्थापन, शिक्षण खातें, राज्य शिक्षणीक संशोधन आनी प्रशिक्षण मंडळ (एससीईआरटी), आनी विद्यार्थ्यांनी केल्ल्या यत्नांक लागून निकाल चड लागपाची शक्यताय आसा अशें शेटये हांणी सांगलें.
अंदूं 1 ते 21 मार्च ह्या काळांत वट्ट 32 परिक्षा केंद्रांनी 10वेच्या वर्साची परिक्षा जाली. 8 केंद्रांनी ही तपासणी केल्ली. अंदूं वट्ट 2046 परिक्षकांची नेमणूक जाली. हे परिक्षेक वट्ट 9280 भुरगीं हाजीर रावलीं. तातूंतले 8,814 पास जाले. परिक्षा घेतिल्ल्या वट्ट 9,557 चलयां मदीं 9,147 चलयो पास जाले. हाचे भायर वट्ट 575 खाजगी विद्यार्थ्यां मदले 131 विद्यार्थी अंदूं पास जाले. 12 आयटीआय मदलो एकूय आयटी पास जालो ना. 359 रिपीटरांतले 172 पास जाले. पास जावपाची टक्केवारी 47.91 आशिल्ली.
अंदूं वट्ट 477 दिव्यांग विद्यार्थी परिक्षेक हाजीर रावले. तातूंतले 94.34 टक्के म्हणल्यार 450 जाण पास जाले. ह्या विद्यार्थ्यांक परिक्षेच्या शुल्काचेर 50 टक्के सवलत, खाशेली बसपाची वेवस्था, परिक्षेक चड वेळ, लागसारची परिक्षा केंद्रां अशो वेगवेगळी सुविधा दिल्ल्यो. संजय शाळेंतल्या 26 विद्यार्थ्यां मदले 26, सेंट झेवियर अकादमींतल्या 16 विद्यार्थ्यां मदले 17 आनी लोकविस्वास प्रतिश्ठांनांतले 4 विद्यार्थी पास जाले अशें शेटये हांणी सांगलें.
धावेच्या वर्गांत एका वा दोन विशयांत अपेस आयिल्ल्या विद्यार्थ्यांक एटीकेटी वांगडा इकराव्या वर्गांत प्रवेश दिवपाची सुविधा मंडळान दिल्या. अंदूं अशा 631 विद्यार्थ्यांक एटीकेटी मेळ्ळ्या. परिक्षेचे अर्ज फाटीं घेतिल्ल्या विद्यार्थ्यां खातीर 5 मे 2025 दिसा ही परिक्षा जातली.
फुडल्या वर्सा 10वेची परिक्षा 2 मार्चाक
फुडल्या वर्साची 10वेची परिक्षा 2 मार्च 2026 दिसा जातली. निमाणी तारीख बेगीन जाहीर जातली. फुडल्या वर्सा दरेक विशय परिक्षे उपरांत उण्यांत उणो एक दीस सुटी दितले. फुडल्या वर्साचे सुरवेकय निकाल जाहीर करतले अशें शेटये हांणी सांगलें.
पडताळणेची निमाणी तारीख 19 एप्रील
उत्तरपत्राची फोटोकॉपी मेळोवपाची आनी निकाला संबंदी गूण तपासपाची निमाणी तारीख 15 एप्रील, जाल्यार पडताळणीची निमाणी तारीख 19 एप्रील आसा. विद्यार्थ्यांनी आपल्या शाळेंतल्यान ही विनवणी करची पडटली. हाचे उपरांत शाळा ही विनवणी मंडळाक ऑनलायन धाडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
