भांगरभूंय | प्रतिनिधी
नाशीक, खबरां संस्था: सध्या महाराष्ट्रांत धावेची परिक्षा चालू आसा. परिक्षा दिवपाच्या वेळार विद्यार्थ्यांच्या शाळेच्या बॅगांत पुस्तकां आनी पेन आसपाक जाय. मात, नाशिकांत एके शाळेंत परिक्षा दिवपाक आयिल्ल्या विद्यार्थ्यांच्या बॅगांत कोयतो सांपडलो. सतपूर पुलीस स्टेशनांत हाचो गुन्यांव नोंद जाला.
विद्यार्थ्याच्या शाळेच्या बॅगांत कोयतो
१० वी हो दर एका विद्यार्थ्याच्या जिवितांतलो म्हत्वाचो पांवडो. हे परिक्षे खातीर विद्यार्थी दीस रात अभ्यास करतात. बरे गूण मेळोवन कॉलेजींत प्रवेश मेळोवप हें दरेकाचें सपन. कांय जाणांक दोतोर जावपाची इत्सा आसता, जाल्यार कांय जाणांक अभियंतो जावपाची. मात, नाशिकांत धा मदल्या एका विद्यार्थ्याच्या कामाक लागून शाळा प्रशासन अजापीत जालां. नाशिकांतल्या उद्देगीक वाठारांत आशिल्ल्या हिंदी माध्यम शाळेंतल्या एका विद्यार्थ्यान परिक्षेक आयिल्ले कडेन कोयतो हाडलो.
सतपुरच्या हिंदी माध्यमाचे शाळेंत परिक्षा आशिल्ली. सदचे भशेन सगळे विद्यार्थी शाळेंत आयले. परिक्षा सुरू जावचे पयलीं सगल्या विद्यार्थ्यांनी बॅगां परिक्षा हॉलाच्या भायर दवरलीं. ह्या परिक्षा केंद्रांत सुरक्षा रक्षक म्हणून होमगार्डाची नेमणूक जाल्या. ताका भायर दवरिल्ल्या बॅगांचेर दुबाव आयलो. बॅगां तपासतना तातूंत ताका कोयतो मेळ्ळो. शाळेच्या वेवस्थापनान ही म्हायती सातपूर पुलिसांक दिली. हे घडणुकेची म्हायती मेळ्ळ्या उपरांत पुलिसांचो एक पंगड शाळेंत आयलो. परिक्षे उपरांत दुबावीत बॅग उखलपी विद्यार्थ्याक पुलिसांनी ताब्यांत घेतलो. विद्यार्थ्याक कोयत्या विशीं विचारलें तेन्ना ताणें अस्पश्ट जाप दिली. कोयतो खंयच्यान आयलो? कोणें कोयतो दिलो? पुलीस अश्या जायत्या प्रस्नांची जाप सोदतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
