भांगरभूंय | प्रतिनिधी
बापूय धुवां सयत तीग जखमी; एकली धूव गोमॅकाँत दाखल
फोंडें: धारबांदोड्यां घातक जंक्शनाचेर म्हाल व्हरपी ट्रकाचो धपको स्कुटरीक बसून सपना गांवकार (17), प्राची गांवकार (6) आनी मंगलदास गांवकार (45, रा. दावकोण-धारबांदोडें) हीं तिगां जाणां जखमी जालीं. गंभीर जखमी जाल्ल्या सपना गांवकार हिका अदीक उपचारा खातीर गोमॅकाँत दाखल केलां. जाल्यार हेर दोन जखमींचेर पिळयें भलायकी केंद्रांत उपचार करून घरा धाडून दिल्यात.
मेळिल्ले म्हायती प्रमाण मंगलदास गांवकार आनी तांच्यो दोन धुवो धारबांदोडें सावन दावकोणा आपल्या घरा वतालीं. त्या वेळार विरुद्ध दिशेन येवपी केए 22 एए 3588 क्रमांकाच्या ट्रकाचो धपको स्कुटरीक बसलो. हातूंत स्कुटरी वेले तिगूय जाण रस्त्यार पडले. जखमींक रोखडेंच वाठारांत गस्तीर आशिल्ल्या पुलीस वाहनांतल्यान पिळयें भलायकी केंद्रांत दाखल केले. उपरांत जखमी जाल्ली सपना गांवकार हिका अदीक उपचारा खातीर गोमॅकाँत दाखल केली. फोंडें पुलिसांनी अपघाताचो पंचनामो केला.
फाटल्या वर्सा नोव्हेंबर म्हयन्यांत ह्याच घातक जंक्शनाचेर दोन दुचाकी मदीं अपघात जावन एकल्याक मरण आयिल्लें. योगायोगान मंगळारा अपघातांत जखमी जाल्ली आनी फाटल्या वर्सा मरण आयिल्ली व्यक्ती लेगीत दावकोण गांवांतली आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
