धारबांदोडें म्हालाची वळख आशिल्लो ‘संजिवनी’ चार वर्सां सावन बंद

भांगरभूंय | प्रतिनिधी

फोंडें: धारबांदोडें म्हालाची वेगळी वळख निर्माण करपी संजिवनी साकर कारखानो बंद जावन 4 वर्सां जालीं. वट्ट 46 वर्सां गळीत मोसम केल्लो संजिवनी साकर कारखान्याक फक्त 7 खेपे फायदो जाल्ल्याची नोंद आसा. तशेंच एका काळार 2222 ऊस उत्पादक आशिल्ले संख्येंत व्हड प्रमाणांत उणाव जाल्लो दिसता.

संजिवनी साकर कारखान्यांत 46 वर्सांच्या गळीत मोसमांत फक्त 7 खेपे फायदो जाल्लो. फाटल्या कांय वर्सां सावन ऊस उत्पादनांत जावपी उणाव आनी चड लुकसाण सोंसचें पडिल्ल्यान संजिवनी साकर कारखामो बंद दवरपाचो निर्णय सरकारान घेतलो. पूण सरकारान कांय वर्सांत कारखानो सुरू करपाचें आस्वासन दिल्लें, पूण 4 वर्सां जालीं तरीय अजून मेरेन कारखानो सुरू करपाची प्रक्रिया सुरू करूंक ना. ऊस उत्पादकांनी खूब खेपे आंदोलनां केलीं. पूण आस्वासनां बगर ऊस उत्पादकांक कांयच मेळूंक ना. अखेल फाटल्या सोमारा पणजेच्या आझाद मैदानाचेर आंदोलन सुरू केले उपरांत अखेल सरकारान परतून ऊस उत्पादकांक इथेनॉल प्रकल्प सुरू करपाचें आस्वासन दिलां. रोखडीच लोकसभा वेंचणूक जातली ताका लागून सरकार केन्ना आस्वासन पुराय करतलें, हाचेर ऊस उत्पादकांचें लक्ष लागलां.

संजिवनी साकर कारखानो बंद केले उपरांत 2021 त वट्ट 723 ऊस उत्पादकांक 11 कोटी 83 लाख 73 हजार 212 रुपया, 2022 त 690 ऊस उत्पादकांक 10 कोटी, 28 लाख, 91 हजार, 116 रुपया जाल्यार 2023 त 8 कोटी, 83 लाख, 35 हजार, 734 रुपया अनुदान म्हूण रकम सरकारान ऊस उत्पादकांच्या बँक खात्यांत जमा केल्या. कारखान्याच्या इतिहासांत 1996- 97 त सगळ्यांत चड 164 दीस कारखानो चालू उरलो. 1988- 89 त 161 दीस, 1979- 80 त आनी 2007-08 त दरेकी 158 दीस कारखानो चालू आशिल्लो.

46 वर्सांचे कारकिर्दींत संजिवनी साकर कारखान्यांत 1998- 99 त सगळ्यांत चड 1 लाख 95 हजार 808 टन ऊसाचें गळीत केल्लें. ते आदीं 1995- 96 त 1 लाख 90 हजार 277 टन ऊसाचें गळीत केल्ल्याची नोंद जाल्या. संजिवनी साकर कारखान्याचें प्रशासक सतेज कामत हांणी कारखानो बंद जावन 4 वर्सां जालीं. कारखान्यांतल्या मशिनां कडेन कामगारांक वचपाक दिवपाक मेळना. कामगारांनी नव्यान तयार केल्ल्या फार्मांत धाडल्यात. कांय मेजकेच कामगार मिशिनांचेर नदर दवरचे खातीर तैनात रावल्यात.