भांगरभूंय | प्रतिनिधी
फोंडें: धारबांदोडें म्हालाचें भाग शिक्षण अधिकारी कार्यालयांत सध्या खूबश्यो सुविधा मेळनात. उणे कामगार आनी म्हालांत भेट दिवचे खातीर गाडी नाशिल्ल्यान भाग शिक्षण अधिकाऱ्यांक स्वताचे गाडयेंतल्यान प्रवास करचो पडटा. सरकारान म्हालांतल्या भाग शिक्षण अधिकाऱ्यांक गरजेच्यो सुविधा दिवपाची लोकांनी मागणी केल्या.
धारबांदोडें म्हाल निर्माण जाले उपरांत भाग शिक्षण अधिकारी कार्यालय पिळयें वाठारांत सुरू केल्लें. सुरवेक निरंजन नायक हांची भाग शिक्षण अधिकारी म्हूण नेमणूक केल्ली. कांय म्हयन्यां आदीं निरंजन नायक सेवेंतल्यान निवृत्त जाल्यात. सध्या तांचे सुवातेर सीताराम नायक हांची नेमणूक जाल्या. भाग शिक्षण अधिकारी कार्यालयांत एक भाग शिक्षण अधिकारी आनी एक कर्मचारी काम करता. ते भायर एक सुरक्षा रक्षक आसा.
कार्यालयांत बेगिनूच कंप्युटर आनी हेर साहित्य दितले. ताका लागून कार्यालयांत आनीक कर्मचाऱ्यांची गरज लागतली. निरंजन नायक हांणी हे आदींच फावोशे कर्मचारी आनी गाडी दिवपाची मागणी खात्या कडेन केल्ली. पूण सरकारान ते मागणेची अजून मेरेन दखल घेवंक ना. म्हालांत सुमार 50 सरकारी विद्यालयां आसात. म्हालांतल्या भाग शिक्षण अधिकारी कार्यालयांत गरजेच्यो सुविधा दिवपाची जापसालदारकी सरकाराची आसा, अशें धारबांदोडेंचे सरपंच विनायक उर्फ बालाजी गांवस हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
