भांगरभूंय | प्रतिनिधी
भांगरभूंय । सरकारी पत्रक
पणजीः महसूल मंत्री आन्तनासियो (बाबूश) मोन्सेरात हांणी शुक्रारा धारबांदोडेच्या सरकारी संकुलातल्या इमारतीत सर्वेक्षण आनी भूंय नोंदणी निरीक्षक कार्यालयाचें उक्तावण केलें. ह्या वेळार सावड्डेचो आमदार आनी जीटीडीसीचो अध्यक्ष गणेश गावकर, दक्षीण गोंय जिल्हा पंचायत अध्यक्ष सुवर्णा तेंडुलकार, जिल्हो पंचायत वांगडी सुधा गांवकार, महसूल सचीव संदीप जॅकिस, धारबांदोडेचो सरपंच विनायक गांवस आनी हेर मानेस्त हाजीर आशिल्ले.
जमनीचें विभाजन आनी पुनर्सर्वेक्षणाची प्रकरणां जाता तितल्या बेगीन निकालात काडपाक मोन्सेरात हांणी संबंदीत अधिकाऱ्यांक ह्या वेळार सांगलें. धारबांदोडें तालुक्यांतल्या लोकांक जमनीचे दाखले, सर्वेक्षण, नोंदणी आनी हेर कामांखातीर केपे हांगा वचपाची आतां गरज पडची ना, अशेंय तांणी सांगलें. गणेश गावकर हांणी धारबांदोडा तालुक्यात सर्वेक्षण आनी भूंय नोंदणी निरीक्षक कार्यालय सुरू जाल्ले खातीर खोस उक्तायली
महसूल सचीव संदीप जॅकिस हांणी सर्वेक्षण आनी भूंय नोंदणी विभागाच्या सुविधां सयत सरकारान फ्लॅट वा प्लॉटांची जमीन गृहनिर्माण संस्थांक आनी मालकांक नांवार करून घेवप शक्य जावचे म्हूण जाहीर केल्ल्या नोंदणी शुल्क आनी स्टॅम्प ड्युटी सवलतीचीय ह्या वेळार म्हायती दिली. सुरवेक खात्याचे उपसंचालक .मंदार नायकान मानेस्तांक येवकार दिलो आनी संचालक जॉन्सन फर्नांडीसान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
