भांगरभूंय | प्रतिनिधी
भांगरभूंय । प्रतिनिधी
पेडणेः एनएच 66 चेर धारगळ दोन खांबे रस्त्याकडेन फ्लायओव्हर बांदपाची लोकांची मागणी आसा. ही मागणी सरकारान मानून घेतली ना जाल्यार लोकांक घेवन रस्त्यार येवपाची शिटकावणी धारगळ पंचायत मंडळ आनी नागरिकांनी दिल्या.
दोन खांबे हांगा फ्लायओव्हर बांदपाचें पयलीं थारल्लें. मात उपरांत ही येवजण रद्द केली. फ्लायओव्हराची सामकी गरज आसतना ती कोणे रद्द केली हाची चवकशी करून लोकसभा वेंचणुके पयलीं सरकारान फ्लायओव्हर बांदपाचें आस्वासन दिल्यार आमी भाजपा वटेन रावतले ना जाल्यार रस्त्यार येतले अशें नागरिकांनी पत्रकारां कडेन उलयतना सांगलें. धारगळचो सरपंच अनिकेत साळगांवकार, पंच सतीश धुमाळ, सिद्देश धारगळकार, रोहिदास हरमलकार, जिल्हो पंचायत वांगडी मनोहर धारगळकार हांका लेगीत फ्लायओव्हर जाल्लो जाय.
आमदार प्रवीण आर्लेकार आनी मुख्यमंत्री डॉ सावंत हांकां फ्लायओव्हर कित्याक जाय हें आमी पटोवन दितले अशें सरपंच साळगांवकारान सांगलें. दोन खांब्यांकडेन फ्लायओव्हराची सामकी गरज आशिल्ल्यान म्हामार्गाचो आराखडो तयार करपी अभियंत्यान तशें नियोजन केल्लें. मात आतां ती येवजण रद्द केल्या अशें मनोहर धारगळकारान सांगलें.
येरादारी सुरळीत जावपा खातीर आनी अपघात जावचे न्हय हे खातीर फ्लायओव्हराची गरज आसा. तशें निवेदन गोंय सरकार आनी राष्ट्रीय म्हामार्ग प्राधिकरणाक दितले अशें पेडणे तालुको विकास समितीचो अध्यक्ष व्यंकटेश नायक हांणी सांगलें. राष्ट्रीय म्हामार्गा वयल्यान वचपी वाहनांचो आंकडो आनी तांचो वेग मतींत घेवन साबार लोकांच्या जिवाक आशिल्लो धोको पयस करपा खातीर फ्लायओव्हर बांदप सामकें गरजेचें आसा अशें नामदेव परवार हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
