धारगळे स्टेडियम उबारपा खातीर जीसीएचो यत्न

भांगरभूंय | प्रतिनिधी

अध्यक्ष महेश देसायः गोंयांत 20 नवीं प्रशिक्षण केंद्रां सुरू करतले

पणजी: गोंय क्रिकेट असोसिएशनाच्या (जीसीए) वर्सुकी साबार बसकेंत येता त्या तीन वर्सां भितर धारगळे वा म्हावळिंगें हातूंतले एके सुवातेर नव्या आंतरराष्ट्रीय दर्जाचें स्टेडियम बांदपाक सगल्या वांगड्यांनी म्होर मारल्या. ह्या दोनूय सुवातां मदीं चडसो करून धारगळे स्टेडियम उबारपा खातीर जीसीएचो यत्न आसतलो अशी म्हायती जीसीएचे अध्यक्ष महेश देसाय हांणी पत्रकार परिशदेंत दिली.

पर्वरे जीसीएच्या सभाघरांत काल (आयतारा) ही वर्सुकी साबार बसका जाली. नव्या कार्यकारिणी समितीची ही पयलीच साबार बसका आशिल्ल्यान अध्यक्षांनी हाजीर आशिल्ल्या सगल्या वांगड्यांचे उपकार मानले. हे बसकेंत गोंयच्या क्रिकेटीचे उदरगती खातीर खूबशे म्हत्वाचे निर्णय घेतले.

गोंयांत 20 नवीं प्रशिक्षण केंद्रां सुरू करपाचो निर्णय घेतलो. हातूंत ‘पींक फोर्स’ ह्या नांवान खासा चलयां खातीर पांच प्रशिक्षण केंद्रां सुरू करतले. हाचे पयलीं फाटल्या समितीच्या वेळार 12 केंद्रां सुरू जाल्ली. पूण तातूंतलीं फक्त तिनूच केंद्रां सक्रीय उरिल्लीं.

क्रिकेटींत पारदर्शकताय राखपा खातीर आनी गुणवत्ता वाडोवपा खातीर नव्या समितीन 16 वर्सा पिराये सकयल्या भुरग्यांक प्रशिक्षण दिवपा खातीर रणजी क्रिकेट खेळगडो प्रितम गांधे, तशेंच चलयांची प्रशिक्षक म्हूण नेहा तन्वर हांची नेमणूक केल्या.

ह्या 20 केंद्रांतल्यान वेंचीक खेळगड्यांक जीसीएच्या विशेश प्रशिक्षण शिबिरांत प्रवेश दितले. ह्या शिबिरांतल्यान रणजी क्रिकेटींत खेळपा खातीर नवे खेळगडे तयार जावपाची अपेक्षा आसा.

फाटल्या समितीच्या काळांत हिशेबांत तफावत आशिल्ल्याची शक्यताय आशिल्ल्यान अकबर मुल्ला हांचे अध्यक्षताये खाला साईश म्हांब्रे आनी प्रसाद फातर्पेंकार हांची तपास समिती नेमपाक साबार बसकेंत मंजुरी दिली. ह्या समितीच्या अहवाला उपरांत फुडलो निर्णय घेतले अशें अध्यक्ष महेश देसाय हांणी सांगलें.

‘जीपीएल’ परतून सुरू करपाचो हावेस

फाटल्या आठ ते णव वर्सां सावन बंद आशिल्ली गोवा प्रिमियर लीग (जीपीएल) सर्त अंदूं सावन परतून सुर करपाचो नवे समितीचो हावेस आसा. इंडियन प्रिमियर लिगेंत (आयपीएल) खेळपी खेळगड्यांक जीपीएल लिगेंत खेळपा खातीर मेळचे हे खातीर जीसीएचो यत्न आसतलो.