भांगरभूंय | प्रतिनिधी
28 ते 30 डिसेंबर मेरेन जातलो महोत्सव
भांगरभूंय । प्रतिनिधी
पणजी : धारगळ पंचायतीन मान्यताय दिले उपरांत सनबर्न महोत्सवाक पर्यटन खात्यान तत्वता मान्यताय दिल्या. 28 ते 30 डिसेंबर मेरेन हो महोत्सव जातलो, अशी म्हायती पर्यटनमंत्री रोहन खंवटे हांणी दिली. कोविडाचो काळ सोडलो जाल्यार गोंयांत दर वर्सा वर्स सोंपपाक सनबर्न महोत्सव जाता. अंदूंय तो जातलो.
सगळे परवाने घेवपाची जापसालदारकी आयोजक कंपनीची आसा. पंचायतीच्या ना हरकत दाखल्या सयत हेर सगळे परवाने घेवचे पडटले. सगळे परवाने घेतल्या उपरांतूच मान्यताय निश्चीत जातली. सध्या तत्वता मान्यताय दिल्या. परवाने घेवपाक कंपनीक अपेस आयलें जाल्यार मान्यताय रद्द करपाचे अधिकार सरकारा कडेन आसात, अशें मंत्री खंवटे हांणी सनबर्ना विशीं उलयतना सांगलें. हाचे पयली बरीच वर्सां राज्यांत सनबर्न महोत्सव जाला. सनबर्न महोत्सवाक लागून पर्यटन संबंदीत वेवसायांक लाव जाता. परवाने घेवन आनी शिस्तींत महोत्सव जावपाक कांयच हरकत ना, अशेंय तांणी सांगलें.
सनबर्न आयोजन करपी स्पेसबावंड वेब लॅबस प्रायव्हेट लिमिटेड कंपनीन परवान्या खातीर 13 नोव्हेंबराक पर्यटन खात्या कडेन मान्यताये खातीर अर्ज केल्लो. पर्यटना विशींच्या उंचेल्या पावंड्या वयले समितीन बसका घेवन मान्यताय दिवपाची शिफारस केली. हे शिफारशी उपरांत पर्यटन खात्यान मान्यताय दिल्या.
ग्रामसभेंतल्या थारावाक आयोजकां कडल्यान आव्हान
सनबर्न महोत्सवाचे आयोजक स्पेसबावंड वेब लॅब्स प्रायव्हेट लिमिटेड हांणी ग्रामसभेच्या थारावाक पंचायत संचालका कडेन आव्हान दिलां. धारगळ ग्रामसभेंत सनबर्नाक विरोध करपी थाराव संमत जाल्लो. गोंय पंचायत राज कायद्याच्या कलम 6 (5) खाला आव्हान दिलां. कायद्या प्रमाण पंचायत संचालकान आव्हान याचिकेची भौशीक सुचोवणी पंचायतीच्या फलकाचेर लावपाचे आदेश दिल्यात. कायद्याच्या कलम 6 (5) खाला ग्रामसभेच्या निर्णयाक लागून कोणाकूय आडखळ येता जाल्यार 30 दिसां भितर पंचायत संचालका कडेन आव्हान याचिका दाखल करपाचो अधिकार आसा. हे याचिकेचेर कोणाकूय बाजू मांडपाची आसल्यार ती 18 डिसेंबर 2024 मेरेन मांडची अशें पंचायत संचालकान स्पश्ट केलां.
गांवाक नाका, जाल्यार सनबर्न नाका : टीटीएजी
सनबर्नाक लागून पर्यटन वेवसायाक कांय प्रमाणांत उर्बा मेळटा. तरी लेगीत गांवच्या लोकांक नाका जाल्यार सनबर्न जावपाक जायना, अशें टीटीएजीचे अध्यक्ष जॅक सुखीजा हांणी म्हणलां. सनबर्न महोत्सवाक लागून आवाज तशेंच हेर प्रदूशण जावपाक जायना. तशेंच घुंवळी वखदांच्या वापरा सारके गैरवेव्हार जावपाक जायना. योग्य तरेन आयोजन केलें जाल्यार सनबर्न जावपाक हरकत ना. गांवच्या लोकांक विस्वासांत घेवन हो महोत्सव जावपाक जाय. अशें टीटीऐजीचे अध्यक्ष जॅक सुखीजा हांणी म्हणलां. तशेंच सनबर्न महोत्सव डिसेंबरांतूच जावपाक जाय अशें ना. येरादारीच्या वेवस्थापना खातीर महोत्सव फेब्रुवारी वा मार्चांत जावप योग्य थारतलें, अशेंय तांणी सांगलें.
आमदार आर्लेकार हांचे कडेन संपर्क ना
खंयचेच स्थितींत धारगळे सनबर्न महोत्सव जावपाक दिवचों ना, अशें आमदार प्रवीण आर्लेकार हांणी स्पश्ट केल्लें. सनबर्नाक तत्वता मान्यताय दिले उपरांत तांचे कडेन संपर्क सादपाचो यत्न केल्लो. तांणी फोन घेवंक नाशिल्ल्यान तांचे कडेन संपर्क जावंक पावलो ना.
याचिकांची सुनावणी 19 डिसेंबराक
सनबर्न विशींचे घडामोडीची म्हायती गोंयांतल्या मुंबय उच्च न्यायालयांत बिरेस्तारा दिली. ताका लागून महेश प्रभुदेसाय सयत 17 जाणांनी दाखल केल्ले जनहीत याचिकेंत दुरुस्ती करचे खातीर न्यायालया कडल्यान वेळ मागलो. तशेंच भरत बागकार हांणी दाखल केल्ले जनहीत याचिकेंत कंपनीन म्हणणें सादर केलां. हाची दखल घेवन न्यायालयान सनबर्न विरोधांत दाखल केल्ल्या तिनूय याचिकांची सुनावणी 19 डिसेंबराक दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
