भांगरभूंय | प्रतिनिधी
पणजीः गुंतवणूक प्रोत्साहन महामंडळाच्या कॅसिनो प्रकल्पांक मान्यताय दिवपा खातीर उदका स्रोत खात्यान धारगळेचें शिंपणावळ कमांड क्षेत्र रद्द केलां, असो आरोप करून विरोधकांनी सभाघरांत बोवाळ घातलो. कमांड क्षेत्र उदरगत मंडळान (काडा) हांणी अजून मेरेन ही कमांड क्षेत्र रद्द करुंकना अशें उदका स्रोत मंत्र्यान सांगलें. जाल्यार कार्डाची मान्यताय आसल्यारूच आयपीबी ह्या प्रक्लपा खातीर मंजुरी दितलें, अशें स्पश्टीकरण मुख्यमंत्री डॉ. प्रमोद सावंत हांणी दिली.
७ मे २०२५त धारगळे ३ लाख चौखण मीटर तिळारी शिंपणावळ कमांड क्षेत्र रद्द करचें असो प्रस्ताव उदका स्त्रोत खात्यान काडपाक दिल्लो. मात शेतेकारांचें हीत जपचें सोडून आयपीबी वरवीं येवपी कॅसिनो प्रकल्पाचें फावरान कमांड क्षेत्र रद्द करपाचो निर्णय कित्याक घेतलो, असो प्रस्न विरोधी पक्ष फुडारी युरी आलेमांव हांणी केलो.
हाचेर जाप दितना उदका स्त्रोत मंत्र्यान सांगलें, सभाघराची दिकाभूल करपाचे यत्न चल्ला आनी आमी शिंपणावळ क्षेत्र राखून दवरपा खातीर कटीबध्द आसा.
काडान अजून मेरेन ही कमांड क्षेत्र रद्द करुंक ना. ही ३३ हॅक्टर शेत जमीन शेतकारांनी विकल्या, काडान न्हय आनी फुडें तांची विक्री जावन ती डेल्टीन हांणी विकती घेतल्या. आयपीबीन तांकां परवानगी दिल्या अशें सांगून हे क्षेत्र रद्द करपा खातीर तांणी काडात अर्ज केला. काडान अजून मेरेन कसलोच निर्णय घेवंकना आनी १५ ऑगस्टा उपरांत काडाची बसका जावन फुडलो निर्णय घेतले, अशी म्हायती उदका स्त्रोत मंत्र्यान दिली.
हे विशीं उलयतना हे सुवातेर आदारातिथ्य प्रकल्प उबारपा खातीर आयपीबीकडेन अर्ज आयिल्लो आनी हो मोपा विमानतळा लागसार येवपी प्रकल्प पर्यटनाचे नदरेन म्हत्वाचो आसा.
ह्या प्रकल्पा खातीर सरकारान जमीन दिवंक ना. जे जमनी खातीर कंपनीन अर्ज केला ती तांची स्वताची. जर काडा ह्या प्रकल्पांक मान्यताय दिता जाल्यारूच आयपीबी ह्या प्रकल्पांक पांचवो बावटो दाखयतलें. मात सद्या हो विशय उच्च न्यायालयांत न्याय प्रविश्ठ आसा, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
