भांगरभूंय | प्रतिनिधी
पणजी : धारगळेच्या सुकेकुळण वाठारांत सोमारा सकाळीं ७.५० वरांचेर एका १७ वर्सां पिरायेच्या विद्यार्थ्याचेर जाल्ल्या ॲसीड हल्ल्याक लागून बरोच बोवाळ निर्माण जाला. ह्या हल्ल्यांत ऋषभ उमेश शेट्ये (१७) हो तरणाटो गंभीर जखमी जालो. ताचेर सध्या बांबोळेच्या गोमेकॉ हॉस्पिटलांत उपचार सुरू आसात.
ऋषभ म्हापशेंच्या सारस्वत उच्च माध्यमीक विद्यालयांत शिकता. सदां भशेन तो आयज सकाळीं काॅलेजींत वचपाक बसीची वाट पळयत उबो आशिल्लो. तेन्ना थंय दुचाकी वेल्यान आयिल्ल्या दोगां अनवळख्या मदल्या एकल्यान ऋषभाचेर ॲसीड उडोवन थंयच्यान पळ काडलो. ॲसीड पडिल्ल्यान ताचें आंग लासपाक लागलें आनी तो कितें करचें तें सुचना जाल्ल्यान आकांतान सुमार १०० मिटर पयस धांवत गेलो, अशी म्हायती ही घडणूक पळयिल्ल्या प्रत्यक्षदर्शींनी दिली. ऋषभाचो बापूय पुलीस आसा.
ह्या ॲसीड हल्ल्या उपरांत ह्या वाठारांत बरोच बोवाळ जालो. थळाव्यांनी रोखडीच हे विशीं पुलिसांक म्हायती दिली. कांय वेळान पेडणें पुलीस स्टेशनाचो पंगड घडणुके सुवातेर पावलो. हे विशीं पुलीस तपास करतात.
ह्या हल्ल्या उपरांत जखमी अवस्थेंत ऋषभाक गोमेकॉंत व्हेलो. सध्या ताचेर दोतोरांचो पंगड लक्ष दवरून आसा. ह्या हल्ल्याचें नेमकें कारण आजूनय स्पश्ट जावंक ना. हल्लो करपी कोण आशिल्ले हाचो तपास पुलीस करतात. पेडणें पुलीस घडणुके सुवातेवेली सीसीटीव्ही फुटेज तपासतात. हे घडणुकेक लागून थळाव्या नागरिकां मदीं भंयाचें वातावरण निर्माण आनी अशे तरेच्या हल्ल्याचो नागरीक निशेध करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
