धारगळे लाखांनी लिटर उदकाचो इबाड

भांगरभूंय | प्रतिनिधी

तिळारी खारज पावला पावलार झिरपता; शेताचें जालां तळें

भांगरभूंय । प्रतिनिधी

पेडणें: पेडणें म्हालांत तिळारी प्रकल्पाचें खारज पावला पावलार झिकपता. ताका लागून हजारांनी न्हय जाल्यार लाखांनी लिटर उदकाचो इबाड जाता. धारगळ दाडाची वाडी वाठारांत आयुष हॉस्पिटल वाठारांत, सुकेकुळण वाठार, तोरशें वाठारांत तिळारी खारजाक व्हड प्रमाणांत खांवटीं पडल्यांत. ताका लागून कुशीच्या शेतांक तळ्याचें स्वरूप आयलां. चिऱ्यां खणी उपाट भरल्यात. ह्या सगळ्या प्रकारा कडेन शिंपणावळ खात्याची आडनदर जाल्ल्याचें दिसता.

राज्य सरकारान महाराष्ट्र सरकारा वांगडा कबलात करतना तिळारी वाठारांत उदकाचो प्रकल्प उबारलो. 75 टक्के उदक गोंयाक आनी 30 टक्के उदक महाराष्ट्राक अशें त्या वेळार थारयिल्लें. तेचप्रमाण 75 टक्के खर्च गोंय सरकारान केल्लो. तिळारी प्रकल्पाचे खारज बांदतना तें उदक महाराष्ट्रांतल्यान पेडणें म्हालांत हाडचे खातीर पाटबंधारे खात्या खाला साबार कडेन खारज बांदिल्ले. पूण हें खारजाचें काम निकृश्ट दर्जाचें केल्ल्यान ह्या खारजाक खूब कडेन गळटी लागल्या.

मजगतीं, तोरशें राजवेल वाठारांत तिळारी खारजाक खूब कडेन गळटी लागल्या. ह्या उदकाक लागून ह्या वाठारांतल्या घरांक धोको निर्माण जाला. हे संबंदांत पेडणें म्हाल विकास समितीन हे संबंदांत वेळावेळार आवाज काडला. शिंपणावळ खातें 27 कोटी रुपया खर्च करून बैलपार न्हंयेचे कुशीक झुजा पांवड्यार पंप हावस उबारता. हे न्हंयेचें उदक तिळारी खारजांत सोडून तें शेतकारांक दिवपाची शिंपणावळ खात्याची येवजण आसा. पूण पेडण्यां शेता कुशीकच्यान जे जे खारज गेल्यात ते नादुरुस्त आसात. खूब कडेन ते फुटल्यात. तांची दुरुस्ती आयज मेरेन शिंपणावळ विभागान करूंक ना. तोरश्यां राजवेल वाठारांत झिरपता तें उदक आडावपा खातीर प्लास्टीक घातलां. तेच तरेन धारगळे मेरेन पावला पावलार उदक आडावपाचो यत्न केल्लो दिसता. शेता खातीर ह्या खारजाची खूब गरज आसा, पूण तो बांदतना योग्य तरेन काम करूंक ना. जमनीर काँक्रीट घालपाची गरज आशिल्ली, फातरांचो वापर करपाक जाय आशिल्लो, पूण तशें कांयच करूंक ना.

धारगळे सुकेकुळणाचें जालां तळें

धारगळे सुकेकुळणांत केन्नाच उदक आसना. हो वाठार सदांच सुको आसता. हे खातीर ताका सुकेंकुळण अशें म्हणटात. पूण सध्या ह्या वाठारांत सगळे कडेन उदकूच उदक दिसता. ह्या वाठारांत खारजाक पावला पावलार गळटी लागल्या. ह्या वाठारांतल्या शेतां खातीर हें खारज खूब गरजेचें आनी म्हत्वाचें. ते खातीर शिंपणावळ खात्यान ह्या प्रकरणांत लक्ष घालून पुराय खारजाची ताकतिकेन दुरुस्ती करची, अशी मागणी शेतकारांनी केल्या.