भांगरभूंय | प्रतिनिधी
आमदार प्रवीण आर्लेकारः धारगळे सिमेंट काँक्रीट मिक्सींग प्रकल्पाचें काम उडयलें बंद
भांगरभूंय । प्रतिनिधी
पेडणें: धारगळे प्रदुशण करपी कसल्याच तरेच्या प्रकल्पांक थारो दिवचे नात. थळाव्या लोकांक विस्वासांत घेनासतना, कुशीक व्हड प्रमाणांत लोकवस्ती आसतना सिमेंट काँक्रीट मिक्सींक प्रकल्पाक परवानगी कशी मेळ्ळी? थळावे पंचायतीन दिल्लो ना हरकत दाखलो फाटीं घेतला. आतां हे फुडें हो प्रकल्प बंद जातलो आनी फुडारांत अशे कसलेच प्रदुशण करपी प्रकल्प येवचे नात, हाचेर पंचायतीन लक्ष दिवचें, अशी सुचोवणी आमदार प्रवीण आर्लेकार हांणी केली.
धारगळे उद्देगीक वसणूक आनी लोकवस्ती कुशीक उबारताले तो सिमेंट काँक्रीट मिक्सींग प्रकल्पाचें काम आमदार प्रवीण आर्लेकार हांच्या फुडारपणा खाला सरपंच अनिकेत साळगांवकार, आदले सरपंच भूषम नायक, आदले जिल्हो पंचायत वांगडी तुकाराम हरमलकार, रोहिदास हरमलकार, कोनाडकार, मुरारी परब, लक्ष्मण गांवस, डॉ. युगा आनी हेर थळाव्या लोकांचे हाजिरेंत 21 एप्रीलाक बंद उडयलें. त्या वेळार आमदार आर्लेकार उलयताले.
धारगळे दोन खांब्यार लोकवस्ती कुशीक काँक्रीट सिमेंट मिक्सींग प्रकल्पाचें काम झुजा पांवड्यार चालू आशिल्लें. ज्या वेळार पंचायत वेंचणुकांची आचारसंहिता लागू जाल्ली त्या वेळार पंचायतीचेर प्रशासकीय अधिकाऱ्यांची निवड जाली. त्या काळांत ह्या प्रकल्पाक प्रशासकीय अधिकाऱ्यांनी कोणाकूच विस्वासांत घेनासतना ना हरकत दाखलो दिल्लो.
लोकवस्तींत कसलेय तरेचे प्रदुशण करपी प्रकल्प उबारतना संबंदितांनी थळाव्या लोकांक विस्वासांत घेवपाची गरज आशिल्ली. हो विशय जेन्ना ग्रामसभेंत आयलो, त्या वेळार ताका खर विरोध केलो. आपले कडेन कागाळी आयल्यो तेन्ना आपणे पंचायतीक सुचोवणी केली आनी दिल्लो ना हरकत दाखलो फाटी घेवपाची विनवणी केली. ते उपरांत पंचायत मंडळान तो ना हरकत दाखलो फाटीं घेतलो. आतां ह्या आनी अशा खंयच्याच प्रदुशणकारी प्रकल्पाक आपूण थारो दिवचों ना. हो प्रकल्प 21 एप्रीलाच्यानूच बंद जातलो, लोकांनी बिनधास्त रावचें, अशें आर्लेकार हांणी सांगलें.
सरपंच अनिकेत साळगांवका हांणी सांगलें, आमदार आर्लेकार हांच्या फुडाकारान हो प्रकल्प बंद करपाचो निर्णय घेतला आनी ताका आमी येवकार दितात. अशें प्रदुशणकारी प्रकल्प गांवांत नाकात.
लोकवस्तींत अशा प्रदुशणकारी प्रकल्पांक थारो दिवपी अधिकारी वा प्रशासकीय अधिकारी न्हिदिल्ले काय कितें? हे लोकवस्तींतल्या घरांक नगरनियोजन खात्यान दोळे धांपून परवाने दिल्ले काय कितें? असा प्रकल्पांक लागून सरभोंवतणी धुल्लाचें साम्राज्य पातळटलें आनी दुयेंसांक आमंत्रण मेळटलें. अशा प्रकल्पांक आमी सुवात दिवचे नात, अशें तुकाराम हरमलकार हांणी सांगलें.
अशा प्रदुशणकारी प्रकल्पांक पंचायत वाठारांत परवानगी दिवचे नात, अशें भूषण उर्फ प्रदीप नायक हांणी सांगलें.
प्रदुशण करपी प्रकल्पांक लोकवस्तींत ना हरकत दाखलो कसो मेळपाक शकता? हो प्रकल्प ताकतिकेन बंद करचो. नाका आशिल्ले प्रकल्प लोकांच्या माथ्यार थापचे न्हय. आड मार्गान ह्या प्रकल्पाक ना हरकत दिल्ल्या अधिकाऱ्यांची चवकशी जावची, अशी मागणी अॅड. मुरारी परब हांणी केली.
प्रदुशण विरयत, थळाव्या लोकांक रोजगाराच्यो संदी दिता असो कसलो बरो प्रकल्प आसा जाल्यार आमी येवकार दितले. पूण प्रदुशणकारी प्रकल्पाक मातूय थारो दिवचे नात, अशें रोहिदास हरमलकार हांणी सांगलें. ह्या प्रदुशणकारी प्रकल्पाक लागून भलायकेच्यो समस्या निर्माण जातल्यो. वेळारूच ह्या प्रकल्पाक आळाबंद घालपाक जाय. ते नदरेन आमदार आर्लेकार हांणी पावल उखलिल्ले खातीर डॉ. युगा हांणी समाधान उक्तायलें. तशेंच सगळ्या नागरिकांनी संघटीत जावन अशा प्रकल्पांक थारो दिवचो न्हय, असो उलो मारलो.
उपासाक बसपाची तयारीः लक्ष्मण गांवस
लोकवस्तींतल्या लोकांनी सुरवेक सावनूच ह्या प्रकल्पाक विरोध केला. लोकांच्या सयांची मोहीम चालीक लावन सरकाराच्या संबंदीत खात्याक लेखी निवेदन दिलां. त्या निवेदनाची दखल सरकारान घेवंक नाशिल्ल्यान हें प्रकरण आमी न्यायालयांत व्हेलां. न्यायालय आमचे वटेन निवाडो दितलें, असो विस्वास आसा. जर थंय आमकां न्याय मेळ्ळो ना जाल्यार मरसर उपासाक बसपाची थळाव्यो लोकांनी तयारी केल्या, अशें लक्ष्मण गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
