भांगरभूंय | प्रतिनिधी
पंचायतीची आडनदर; खाशेल्या निधी विशीं लोकांक दुबाव
भांगरभूंय । प्रतिनिधी
पेडणें: सरकार दरेके पंचायतीक, नगरपालिकेक आपल्या वाठारांतलो कोयर एकठांय करचे खातीर खाशेलो निधी दिता. पूण त्या निधीचो योग्य वापर जाता काय ना हे विशीं दुबाव मारपाक लागला. धारगळ पंचायत वाठारांत व्हड प्रमाणांत कोयराच्यो राशी दिसतात. त्यो राशी नितळ करपाक पंचायत फाटी फुडें कित्याक सरता, असो प्रस्न थळाव्या लोकांनी उपस्थीत केला.
दोन खांबे धारगळे ते आमदार प्रवीण आर्लेकार हांच्या घरा मेरेनच्या रस्त्या कुशीक व्हड प्रमाणांत कोयराच्यो राशी दिसतात. ह्यो कोयराच्यो राशी रस्ताद सुण्यांनी आनी हेडग्या गोरवांनी उस्तिल्ल्यान कोयर रस्त्या मेरेन पावला. हाका लागून तो वाठार बुरसो दिसता. पंचायत हे गजाली कडेन कित्याक आडनदर करता, असो प्रस्न थळाव्या लोकांनी उपस्थीत केला.
तेन्नाचे उपमुख्यमंत्री मनोहर आजगांवकार हांणी स्वदेश दर्शन येवजणे खाला गोंय पर्यटन विकास म्हामंडळा वतीन दोन खांबे धारगळ वाठारांत रस्त्याचें सोबितीकरण केल्लें. रस्त्याचे कुशीक मेळत थंय कोयर उडोवपाचे प्रकार वाडिल्ल्यान सध्या हो वाठार बुरसो जाला. ह्या कोयरा मदीं प्लास्टीक कोयर, धारगळ उद्देगीक वसणुकेंतलो कोयर तशेंच बांदकाम साहित्याचोय कोयर आसा. हो वाठार नितळ करपाची थळाव्या लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
