भांगरभूंय | प्रतिनिधी
पेडणें: मोलादीक खैराच्या झाडांची तस्करी करतना धारगळे ग्रामपंचायत वाठारांतल्या दाडाचीवाडीचो कृष्णा रघुनाथ सावंत हाका मारूती ओमनी गाडये सयत ताब्यांत घेवन कारवाय केली. ही कारवाय पेडणें रान अधिकारी हरीश महाले हांच्या नेतृत्वा खाला केली.
दोडामार्ग (सिंधुदुर्ग) म्हालांतल्यान गोंयांत आयिल्ल्या ओंकार हतयाचे हालचालींवर लक्ष दवरपाचे कामगिरींत रानां अधिकारी आनी कर्मचारी गुंथिल्ले आसतना पेडणें म्हालांतल्या खुबश्या भागांतल्या ह्या खैराच्या झाडांची चोरी जाताली. ती मारूती ओमनी आनी बॉलेरो गाडयेंतल्यान जाता हाची कल्पना रानां अधिकारी आनी कर्मचार्यांक आशिल्ली. मात वेळाक लागून कारवाय उरिल्ली.
मजगतीं, आयज रान अधिकार्यांक खैराच्या झाडांची मारुती ओमनी ( जीए ०१ ई ३५६३ ) गाडयेंतल्यान तस्करी करतना दिसून आयलें. तांणी गाडये सयत दुबाविताक ताब्यांत घेवन कारवाय केली.
पेडणे रान अधिकारी हरीश महाले हांच्या फुडारपणा खाला रावंड फॉरेस्टर सुनील नायक, रान कर्मचारी संदीप नारोजी, जितेंद्र नायक, विशाल गांवस आनी अविनाश परब हांणी ही धाडसी कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
