भांगरभूंय | प्रतिनिधी
बाबू आजगांवकार : रवींद्र भवन लेगीत तुयां गेल्ल्याचो दावो
भांगरभूंय । प्रतिनिधी
पेडणें : शेतकारांच्या त्यागांतल्यान धारगळे खेळां नगरी खातीर सरकारान व्हड प्रमाणांत जमीन संपादीत केल्ली. तातूंतली तीन लाख चौखण मिटर जमीन ही आंतरराष्ट्रीय क्रिकेट स्टेडियम बांदपा खातीर गोंय क्रिकेट असोसिएसनाक दिल्ली. थंय अजून मेरेन आंतरराष्ट्रीय क्रिकेट स्टेडियम बांदपा खातीर प्रक्रिया सुरू करूंक ना. ते खातीर सरकारान ही जमीन तांचे कडल्यान परतून घेवन शेतकारांक दिवची, अशी मागणी आदले खेळां मंत्री तशेंच आदले उपमुख्यमंत्री बाबू आजगांवकार हांणी 13 ऑक्टोबराक घेतिल्ले पत्रकार परिशदेंत केली.
ह्या वेळार धारगळ जिल्हो पंचायत वांगडी मनोहर धारगळकार, आदले जिल्हो पंचायत वांगडी प्रदीप पटेकार, टॅक्सी वेवसायीक समीर, कृष्णा तळवणेंकार, आबा तळकटकार, केदार नायक हाजीर आशिल्ले.
आजगांवकार हांणी सांगलें, पेडणें मतदारसंघाचे आमदार म्हूण प्रवीण आर्लेकार वेंचून आयल्यात. तांणी आडनदर केल्ल्यान हो आंतरराष्ट्रीय क्रिकेट स्टेडियम जावपाक शकलो ना. आतां मुख्यमंत्री डॉ. प्रमोद सावंत हांणी हातूंत लक्ष घालून हो स्टेडियम उबारून धाळगळचेंच न्हाय जाल्यार गोंयकारांचें नांव आंतरराष्ट्रीय मळार पावोवचें, असो तांणी उलो मारलो.
जर हो स्टेडियम जावंक ना जाल्यार आमी क्रिकेट असोसिएशनाचेर चेपण हाडटले आनी हो क्रिकेट स्टेडियम बांदून घेतलेच. जर गोंय क्रिकेट असोसिएशनाक थंय क्रिकेट स्टेडियम बांदपाचोच ना जाल्यार कितें बांदपाचें आसा, असो प्रस्न आजगांवकार हांणी ह्या वेळार उपस्थीत केलो. रवींद्र भवना खातीर कला आनी संस्कृती खात्याच्या ताब्यांत 36 हजार चौखण मिटर आसतनाय थंय रवींद्र भवन प्रकल्प उबारपाक आमदार अपेशी थारला. हेच खातीर मांद्रें मतदारसंघांतल्या तुयें वाठारांत रवींद्र भवन प्रकल्प जाता. खंयचोय प्रकल्प मदेगात आशिल्ले सुवातेर जालो जाल्यार ताचो लाव पेडणेंकारांक जातलो, असो विस्वास आजगांवकार हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
