भांगरभूंय | प्रतिनिधी
पेडणें: राष्ट्रीय म्हामार्ग 66 दोन खांब धारगळ जंक्शनार उड्डाण पुलाचें काम सुरू केलां. केंद्र सरकार आनी गोंय सरकार हांच्या पालवान मुख्यमंत्री डॉ. प्रमोद सावंत हांणी दिल्ले गवाये उपरांत ह्या उड्डाण पुलाच्या कामाक गती मेळिल्ल्याचें आमदार प्रवीण आर्लेकार हांणी सांगलें.
धारगळे दोन खांब जंक्शना कडेन राष्ट्रीय म्हामार्ग तयार करीत आसतना नियोजीत सुवातेर उड्डाणपूल जावपाचो आशिल्लो. पूण कांय नागरिकांनी आनी वेवसायिकांनी तेन्नाचे मंत्री मनोहर आजगांवकार हांची भेट घेवन उड्डाणपूल जायत जाल्यार थळाव्या वेवसायिकांच्या वेवसायाचेर परिणाम जातलो हे खातीर उड्डाणपूल रद्द करचो अशी लेखी मागणी केल्ली.
पूण हे सुवातेर व्हड प्रमाणांत अपघात जावन खुबश्या जाणांक मरण आयलां. हे खातीर परतून एकदां थळावे आमदार प्रवीण आर्लेंकार आनी जीत आरोलकार हांची भेट घेवन मुख्यमंत्र्यां कडेन कागाळ केली. उपरांत आर्लेकार हांणी केंद्रीय येरादारी मंत्री नितीन गडकरी हांची भेट घेवन तांकां निवेदन सादर करून थंय उड्डाणपूल गरजेचो आशिल्ल्याचें सांगिल्ले.
उपरांत मुख्यमंत्री डॉ. प्रमोद सावंत हांणी वाठाराची पळोवणी केले उपरांत ह्या पुलाक गती दिवप गरजेचें आसा अशें आस्वासन तांणी दिलें. ते प्रमाण काल सावन ह्या कामाक सुरवात केली.
मजगतीं, ह्या राष्ट्रीय म्हामार्गा वेली जी येरादारी आशिल्ली, ते येरादारींत बदल करपाची पूर्वकल्पना येरादारी खात्यान दिवंक नाशिल्ल्यान येरादारीची कोंयडी जाली. रातीं सावन व्हड प्रमाणांत वाहनांच्यो रांगो कोलवाळ पूल ते धारगळ जंक्शना मेरेन लागिल्ल्यो. कांय वाहन चालकांनी तिडक उक्तावन आमकां हाची पूर्वकल्पना दिल्ली जाल्यार आमी हेर मार्गान वतले आशिल्ले अशें तांणी म्हणलें.
हे विशीं आमदार आर्लेकार हांकां विचारतकच हो उड्डाणपूल म्हत्वाचो थारतलो. ते खातीर तो जाता तितले बेगीन जावप गरजेचें आसा. सद्या येरादारींत थोडो बदल केला. नागरिकांनी ह्या बदला खातीर सहकार्य करचें अशें आवाहन तांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
