भांगरभूंय | प्रतिनिधी
पेडणें: धारगळ पेडण्यां जाल्ल्या दुचाकी अपघातांत निरवडे महाष्ट्रांतलो वासुदेव पेडणेंकार (25, रा. झरबाजार) हाका सुवातेचेरूच मरण आयलें.
हो अपघात मुंबय- गोंय म्हामार्गाचेर धारगळे सकाळीं 12.30 वरांच्या सुमाराक घडलो. दुचाकी सिमेंटाच्या खांब्याक आपटून हो अपघात जालो. अपघाताची म्हायती मेळटाच ताच्या घरचीं गोंयांत येवपाक भायर सरलीं.
मेळिल्ले म्हायती प्रमाण वासुदेव आपले दुचाकी वयल्यान गोंया सावन घरा वतालो. मुंबय- गोंय म्हामार्गा वयल्या धारगळ पंचायत वाठारांत दुभाजका लागसारच्या सिमेंटाच्या खांब्याक ताची दुचाकीन नेटाचो धपको दिलो. ह्या धपक्यान तो रस्त्याचेर उसळून पडिल्ल्यान ताचे तकलेक गंभीर जखम जाली. व्हड प्रमाणांत रगत गेल्ल्यान ताका सुवातेचेरूच मरण आयलें.
मजगतीं, अपघाताची म्हायती दिले उपरांत अॅम्बुलन्सीक येवपाक कळाव जाल्ल्यान ताका मरण आयलें, असो आरोप त्या वाठारांतल्या लोकांनी केला. वासुदेव हो ताच्या कुटुंबांतलो एकलोच चलो आशिल्लो. पेडणें पुलिसांनी अपघाताचो पंचनामो केलो. रस्त्याचे कुशीक व्हड प्रमाणांत रेंव, माती सांचल्या. ताचेर दुचाकी निसरली आनी खांब्याचेर वचून आपटली, असो दुबाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
