भांगरभूंय | प्रतिनिधी
क्रेनीक मारलो धपको; पुण्याचे दोग जखमी
भांगरभूंय । प्रतिनिधी
पेडणें: धारगळच्या राष्ट्रीय म्हामार्ग 66 चेर स्विफ्ट मोटार आनी क्रेन हांचे मदीं जाल्ल्या अपघातांत पुण्याचो रिकी रवी बिनावत (26) हाका सुवातेचेरूच मरण आयलें. हे माटारींत आशिल्ले दोग जाण जखमी जाल्यात. तांचेर सध्या हॉस्पटलांत उपचार चालू आसात.
मेळिल्ले म्हायती प्रमाण धारगळच्या राष्ट्रीय म्हामार्ग 66 चेर पणजी मार्गान पुण्या वचपी स्विफ्ट मोटार (एमएच 12 एचझॅड 2419) आनी क्रेन हांचे मदीं 9 नोव्हेंबराक सकाळीं अपघात जालो. तातूंत एकल्याक सुवातेचेरूच मरण आयलें जाल्यार निधी गोडसे (27, कराड) आनी सुनील (कराड) हे जखमी जाले.
मोपा विमानतळा खातीर लींक रस्तो करपी कंपनीची क्रेन सर्वीस रस्त्याचेर घुंवडायली. त्या वेळार गतीन येवपी स्विफ्ट मोटारीन क्रेनीक धपको मारलो. तातूंत रिकी बिनावत हाका मरण आयलें. अपघाताची म्हायती मेळटाच थळावे आमदार प्रवीण आर्लेकार ताकतिकेन घडणुकेचे सुवातेचेर पावले. पेडणें पुलीस निरिक्षक दत्ताराम रावत हांणी अपघाताचो पंचनामो केलो आनी जखमींक हॉस्पिटलांत दाखल केले. जाल्यार मरण आयिल्ल्या बिनावत हाची कूड बांबोळे पोस्टमार्टमा खातीर धाडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
