धारगळचो सिमेंट काँक्रीट प्रकल्प बंद करचो

भांगरभूंय | प्रतिनिधी

प्रदुशणकारी आशिल्ल्यान भलायकेक घातक आशिल्ल्याचो लोकांचो दावो

भांगरभूंय । प्रतिनिधी

कोरगांवः पेडणें म्हालांतल्या धारगळ पंचायतींत दोन खांब वाठारांत लोकवस्तींत सुरू केल्लो सिमेंट काँक्रीट प्रकल्प लोकांचे भलायकेक घातक आसा. पंचायती सयत हेर संबंदीत सरकारी यंत्रणेचो गरजेचो दाखलो घेनासतना तो सुरू केला. हे प्रकल्प रोखड्या रोखडो बंद करचो, अशी मागणी थळाव्या लोकांनी केली.

उच्च न्यायालयाच्या निर्देशा प्रमाण कासारवर्णेच्या मुळाव्या भलायकी केंद्रांत भलायकी अधिकारी आनी कागाळदार तशेंच सिमेंट काँक्रीट प्रकल्पाचे धनी हांची जोडबसका आयोजीत केल्ली. ह्या वेळार सिमेंट काँक्रीट प्रकल्प गरजेच्या कागदपत्रांचे सोपस्कार पुराय करचे आदींच सुरू केल्ल्याचें मुखार आयलें, अशें थळाव्या लोकांनी पत्रकारां कडेन उलयतना सांगलें.

मयुरी गाडगीळ हांणी सांगलें, हो प्रकल्प पंचायत तशेंच संबंदीत खात्यांक काळखांत दवरून सुरू केला. ह्या प्रदुशणकारी प्रकल्पाक तो सुरू जावचे आदींच लोकांनी विरोध केल्लो.

हो प्रकल्प उद्देगीक वसणुकेंत लोकवस्तीच्या फक्त 20 मिटराच्या परिघांत आसा. ताका लागून हुबपी धुल्ल फुडारांत साबार तरांची दुयेंसां निर्माण करतलो. ह्या बेकायदो आनी प्रदुशण करपी प्रकल्पा आड थळावे लोक न्यायालयांत गेल्यात. मात ते आदीं थळावे पंचायतीन लोकांच्या हिताचो निर्णय घेवचो, अशी मागणी गाडगीळ हांणी केली.

मिथून गांवस हांणी सांगलें, ह्या प्रकल्पा खातीर पंचायतीचो तशेंच खंयच्याच खात्याचो नाहरकत दाखलो तशेंच गरजेचो परवानो ना. ताका लागून हो प्रकल्प बेकायदो थारता. हो प्रकल्प बंद केले बगर आमी कशेच सुसेगात बसचे नात. धारगळकारां वतीन न्यायालयांत बाजू मांडपी वकिलान सांगलें, न्यायालयाच्या निर्देशा प्रमाण बिरेस्तारा कासारवर्णेच्या मुळाव्या भलायकी केंद्रांत भलायकी अधिकाऱ्याचे अध्यक्षते खाला जोडबसका जाली. तातूंत खूबश्या गजालींचेर उजवाड पडलो. प्रकल्प सुरू करचे खातीर गरजेचें आशिल्लें ऑक्युपन्सी प्रमाणपत्र ना. ताका लागून सैम आनी लोकांची भलायकी सांबाळून प्रकल्प सुरू करप कायद्यान बंधनकारक आसा. हे मुखार हाची जापसालदारकी थळावे पंचायतीची आसा.

प्रकल्प रोखड्या रोखडो बंद करतलेः सरपंच

लोकांच्या हिता खातीर पंचायत मंडळाची ताकतिकेची बसका आपयतले. पंचायत मंडळा सयत सचिवाक वांगडा घेवन हो रात दीस चलपी प्रकल्प रोखड्या रोखडो बंद करतले. धारगळ पंचायत लोकां वांगडा आसा. ह्या प्रकल्पा खातीर पंचायतीन नाहरकत दाखलो दिवंक ना. प्रकल्पाक पंचायतीन ट्रेड लायसन्स दिवंक ना, अशें धारगळचे सरपंच अर्जून कानोळकार हांणी सांगलें.

प्रकल्प कायदेशीर, कसलेचं प्रदुशण नाः धनी

धारगळचो सिमेंट काँक्रीट प्रकल्प सरकारान निश्चीत केल्ले उद्देगीक सुवातेंतूच सुरू केला. तो कायदेशीर तरेन सुरू आसा. ह्या प्रकल्पाक लागून कसलेच तरेचें प्रदुशण जायना. हे विशींचो खटलो न्यायालयांत दाखल केला, अशें प्रकल्पाच्या धनयान म्हणलां.