धाडशी जा, तूं संवसार हालोवंक शकता

भांगरभूंय | प्रतिनिधी

ह्या तुज्या निजाच्या विशया भितर तूं तुजो जीव ओत. तातुंनूच उंचेलो हावेस दवर. केन्नाच तुजो तुकाच तोखेवं नाका.

पुज्य भगवद् गीता आमकां सदच्या सामान्य आनी वाजेण्या अस्तित्वा कडल्यान उर्बेभरीत जीण जियेवंपाक वाट दाखयता. ती आमकां सामान्या कडल्यान असामान्या कडेन, उबगणी कडल्यान उमेदी कडेन आनी दुख्खां कडल्यान सुखां कडेन वचपाक शिकयता. तूं एक सादारण मनीस म्हूण जल्माक येता. पूण तुजी रचनाच सामान्या भायल्या मळां भितर झेप घेवपा सारकी आसता.

मोहनदास गांधी हो एक भिजुड आनी किरकोळ वकील कालांतरान महात्मा जालो. ए पी जे अब्दुल कलाम हो एक गरीब कुटुंबात जल्मल्लो मनीस. भारताचो एक उत्कृश्ट राष्ट्रपती जालो. हाचो अर्थ आमचे भितर परिपूर्णतायेची तेंगशी गांठपाची तांक आसा.  

तूं एक एकमेव असो गूण घेवन जल्माक येता. तो तुजो स्वधर्म आसता. पूण तुका तें खबर नाशिल्ल्यान तूं वाट चुकता आनी भलत्याच मृगजळा फाटल्यान हांगा- थंय धांवता. तशें करूं नाका, तूं तुजे भितर पळय. तुजी जबर इत्सा कितें हें सोदून काड. तोच तुजो उपजत धर्म. तोच तुजी जीण सर्वार्थान बदलतलो. जें मळ तुज्या सभावाक परकी आसा तातूंत तूं केन्नाच प्रवीण जावंक शकना. ह्या तुज्या निजाच्या विशया भितर तूं तुजो जीव ओत. तातुंनच उंचेलो हावेस दवर. केन्नाच तुजो तुकाच तोखेवं नाका. तें तुज्या जैताच्या वाटे वयलें आडमेळें जातलें. तें तुका दुख्खी करतलें आनी तुजी वाड आडायतलें. 

गीता तुका तुज्यांतलो सुप्त गुण सोदून काडपाक आनी तुका परिपूर्ण करपाक आदार करता. तुजें रूपांतर मागीर नश्वरांतल्यान शाश्वतांत जाता, करुंक जाय तो फक्त तुज्या विचारांत बदल. 

गीता तुज्या भितरल्या व्यक्तीमत्वाक उबारी दिता. तुजो फोन जेन्ना मंद जाता तेन्ना तो परतून रिचार्ज जावपाची गरज आसता. मागीर तूं अध्यात्मीक मळा वशीन वळटा. हाचो परिणाम म्हण तूं आनंद, आत्मविश्वास आनी उमेदीन फुलता. तू तुज्यो आदल्यो सुवार्थी संवयो सोडून दिता आनी ईश्वरी चितनांनी रमता.

मनीस जसो चिंतता तसो तो घडटा, हो नेम जावन आसा. तूं एक सारको ‘हांव, म्हजें’ इतल्या पुरतेंच चिंतीत रावशीत जाल्यार मोटवो नी दुबळो उरतलो. उंचेल्या ध्येया संबंदान येवज आनी उंचेलें कार्य हातान घे. सगळ्यान उंचेली मोख म्हणल्यार दिश्टावो-  enlightenment. मोख उंचेली आसतकूच मागीर आपसूक तुजी गती आनी तुजी शक्त प्रबळ जातली. 

समेस्तां कडेन मनमेकळेपणान वाग आनी ताच्या सुख -दुख्खांनी वांटो घे. ताचेर मना पसून मोग कर. एक मतींत धर : तूं फक्त तुज्याच जैता खातीर न्हय तर हेरांच्याय जैतां खातीर खोशी जा. तांचे जैत हें तुजेंच जैत अशें मना पासून समज.

जस- जसो तूं गिन्यान जोडटलो तस-तशें तुका भितरतें बळगें प्राप्त जातलें, मागीर तूं जिवीतांतल्या शाश्वत तत्वांचो अभ्यास करतलो. संवसारांतलें चड- उतार तुजें कांयच वाकडें करूक शकचेनात. तूं शांत, थीर आनी निश्चयी जातलो. तूं मुक्त चिंतक जातलो.

गीता तुका सांगीना तूं तुजो वेवसाय वा तुजें भोंवतण बदल म्हूण.  तूं कितें करता तें म्हत्वाचें न्हय. तुजे चित्त खंय थिरावता तें म्हत्वाचें. तूं ल्हान येवजीत जाल्यार ल्हानूच उरतलो. व्हडलें येवजी. धाडशी सपनां पळय. तूं संवसार हालोवंक शकतलो.

जेन्ना तूं तुजें वयलें हांवपणाचें आनी वासनेंचें वजें भायर मारतलो तेन्ना तुजे भितरलो उजवाड लखलखीत जातलो. मागीर सैमाच्यो समेस्त शक्ती तुजे मुखार दिमी मोडटल्यो. घाकलो प्रत्हाद आपणाल्या भावार्था कडेन प्रामाणीक रावलो. ताचो बापूय आनी राकेसांचो राजा हिरण्यकश्यपून ताका जिवानिशी मारपाचो यत्न केलो. पूण उजो ताका हुलपावंक शकलोना, हती ताका गुड्डावंक शकलोना आनी सोरपांचे वीख ताचो जीव घेवंक शकलेंना. कित्याक? तर तो आपले सद्सद्विवेक बुद्धीक जागलो आनी आपणाल्या आत्म्या लागीं एकनिश्ठ रावलो.

(मूळ लेखक : जया रोव)

प्रदीप लवंदे

सिद्धीविनायक अपार्टमेंट, 

हरवळें, साखळी

9923292022