भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंय मुक्ती दिसा सान्ताक्रुज पंचायत घराचो बुन्यादी फातोर बसोवपाची कार्यावळ जाली. विशेश म्हणल्यार वेगवगळ्या धर्माच्या धर्म गुरूचे हजेरेंत हो विधी जाल. हिंदू, मुस्लिम आनी किरिस्तांव धर्म गुरू हे कार्यावळीक हाजीर आशिल्ले. सान्ताक्रुज मतदारसंघाचो आमदार रुदोल्फ फर्नांडीस, सरपंच जेनिफर आलिव्हेरा, उपसरपंच डॉमनीक परेरा, जिल्हो पंचायत वांगडी शिनी ओलिव्हेरा, पंच वागडी आनी लोक ह्या वेळार हाजीर आशिल्ले.
आत्मनिर्भर स्वयंपूर्ण येवजणे खाला 98 लाख रुपया खर्च करून हें पंचायत घर बांदतले. फकत तळमाळेयेचें हें घऱ बांदपाक एक वर्स लागतले. सान्ताक्रुज पंचायतीचें काम सध्या कमी सुवात आशिल्ल्या कार्यालयांतल्यान चलता. आमका पंचायत घराची सामकी गरज आशिल्ली अशें डॉमनीक परेरा हांणी सांगलें. फुडली गोंय मुक्ती दीस कार्यावळ नव्या पंचायत घरांत जातली. पंचायत मंडळाक सरकारी निधी मेळोवन दिवपाक आमदार रुदोल्फ फर्नांडीस हांणी मजत करची अशें तांणी मागलें.
उदरगतीच्या कामां खातीर पंचायतीक निधी कमी पडपाक दिवचो ना. मतदारसंघांतली सगळीं कामा पुराय करून घेतलों अशें रुदोल्फ फर्नांडीस हांणी सांगलें. शिनी ओलिव्हेरा, सान्ताक्रुज चर्चीचे फादर रिडर्ड पिन्हेरो हांचे ह्या वेळार भाशण जालें. पंच वांगडी आम्बेला गोम्स हांणी सूत्रसंचालन केलें. सरपंच जेनिफर ओलिव्हेरान उपकार मानले. पंचायत घराच्या बुन्यादी फातराच्या नांव तकट्याचें अनावरण आमदार रुदोल्फ फर्नांडीस हांचे हस्तुकीं जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
